【愛回家】有種失戀叫最好嘅朋友識咗新朋友！安仔：「菊花依舊，人面全非」

By Ivory on 28 Feb 2019

Digital Editor

雖然2月14已過，但《愛回家之開心速遞》嘅編劇繼續發揮小宇宙，安仔忍唔住要自制短片，趕走「第三者」，向朱凌凌「示愛」！

Photo from 愛回家之開心速遞

話說安仔同朱凌凌一直形影不離，每次朱凌凌上山影日岀，前一晚一定會去安仔屋企訓，第二朝好早起身岀發～即使每次安仔都唔願起身，朱凌凌都冇怨言，仲會幫瞓緊覺嘅安仔著鞋同湊佢岀門口！連安仔公公熊樹根都睇唔過眼，反而朱凌凌好豁達咁話:「得啦！冇問題！次次都係咁咖啦～」

Photo from 愛回家之開心速遞

可能朱凌凌太遷就佢，造就咗安仔嘅港女性格，仲畀熊家人笑佢「港女安」，咩都話「梗係朱凌凌做咖啦，唔係要我做啊嘛～」佢二姨熊若水都話「大學教你咁港女咖？」「大學教你咁小器咖？」（呢句說話好熟，成日聽到啲家長講～）

Photo from 愛回家之開心速遞

然而，有個澳門嚟嘅男仔，佢叫氹仔，同朱凌凌一樣好鍾意影相，所以佢同朱凌凌一見面就雞啄唔斷，仲要去到邊都一齊，搞到安仔好妒忌！

Photo from 愛回家之開心速遞

「糖黐豆」都算啦，朱凌凌識咗氹仔第二日就同佢凌晨上山影日岀，前一晚仲同氹仔一齊訓！！！呢個時候，安仔要爆啦！醋意大爆發！！佢為咗朱凌凌番返佢身邊，佢決定為朱凌凌改變佢嘅「港女格」。佢主動為朱凌凌買早餐，諗住和好，嗰下真係好似一對情侶鬧咗交，其中一方主動氹番另一個咁！睇到都覺得sweet啊～

Photo from 愛回家之開心速遞

點知朱凌凌一早起咗身，仲幫氹仔買早餐，但完全冇預安仔，仲叫安仔拎走佢份早餐。安仔已經夠唔開心，朱凌凌仲背住安仔，同氹仔講：「佢係咁小器咖啦～」，嬲到安仔要同佢絕交！

Photo from 愛回家之開心速遞

安仔番屋企，將朱凌凌喺佢屋企嘅野都pack埋一箱，呢個情境係咪好熟口面呢？冇錯！就係一般同居情侶分手嘅時候，總有一個喺到執前度嘅「遺物」！

Photo from 愛回家之開心速遞

之後，安仔心有不甘，更自制hehe愛情短片，諗住可以喚起朱凌凌對佢嘅愛，可以成功「箍煲」。點知見到氹仔做齊佢為朱凌凌做過嘅事（其實得2樣）:一杯凍檸茶兩份飲，同埋為朱凌凌趴喺地下～佢就黯然離開，自知唔夠人爭，就選擇「放棄」。

Photo from 愛回家之開心速遞

佢本身都諗住之後自己一個，仲自己炒飯食！呢個時候，朱凌凌自己一個拎住新嘅遊戲上門搵番安仔，仲好口甜舌滑咁話:「終於送走咗個瘟神」「我同佢一齊如坐針氈；我同你一齊如沐春風」「我同你先最啱key咖嘛」，安仔聽到之後不知幾冧，佢抿嘴竊笑，春心蕩漾嘅樣，仲出動「少女跳」，彈吓彈吓咁跳番入房，開定電腦同朱凌凌打機添～真係甜到漏，閃盲小編對眼啊！