颱風「山竹」被永久除名 原因係破壞力太強勁 要改返個新名

大家仲記唔記得舊年9月超強颱風「山竹」吹襲香港，對本港造成嚴重破壞，第二日「披荊斬棘」咁返工嘅惡夢呢？破壞力強大嘅山竹近日被除名。

根據世界氣象組織，凡係造成嚴重人命傷亡嘅熱帶氣旋都會被永久除名，以後都唔會再用呢個名嚟命名新嘅熱帶風暴。

世界氣象組織颱風委員會喺27嘅舉行嘅第51次屆會上，就通過將「山竹」（Mangkhut）除名。

Photo from 香港天文台

聯合國亞太經社會以及世界氣象組織颱風委員會按照慣例會根據各成員國嘅提議，將過去一年曾經帶嚟嚴重影響嘅颱風除名，同時要確定上次除名颱風嘅新名。

喺會上，菲律賓提出將2018年第22個颱風「山竹」除名，呢個提議獲得通過。

超強颱風「山竹」舊年9月橫掃廣東，令香港繼2017年超強颱風天鴿後，天文台再次發出10號颶風信號，10號颶風信號更持續咗10個鐘，係戰後第二長嘅10號颶風信號。

Photo from shutterstock

「山竹」吹襲過後，多區都有樹木倒塌，影響路面交通包括巴士、小巴、的士等，同時港鐵服務亦都受到影響，全港打工仔為如常返工而頭痛。

Photo from shutterstock

Photo from shutterstock

「山竹」呢個名由泰國提出，所以泰國喺下次會議上要向委員會提交新名。而今次會上通過咗2017年三個被除名熱帶氣旋嘅新名，由日本提供新名「Yamaneko」代替「天鴿」，意思即野貓；「Koinu」代替「天秤」，意思即狗仔；而香港亦提供新名「鴛鴦」代替「啟德」。

估唔到仲有「除名」呢個慣例，唔知「山竹」會叫咩名呢？

Text: Holiday Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）