download HolidaySmart 假期日常 app
16歲少年離世遺愛捐出器官 受贈者組成「一人籃球隊」完成佢生前嘅夢想

16歲少年離世遺愛捐出器官 受贈者組成「一人籃球隊」完成佢生前嘅夢想

時事熱話 生活熱話
By Jennifer on 04 Mar 2019
Digital Editor

喺2月底舉行嘅中國女子籃球聯賽(WCBA)全明星賽,其中有一隊由50歲大叔、22歲青年同14歲女生所組成嘅5人球隊,佢哋並唔係WCBA嘅球員,但出場時全場包括姚明都起立為佢哋鼓掌。

佢哋球技唔出眾,但仍然有大約兩分鐘嘅比賽時間,其實佢哋都係器官捐贈嘅受贈者,今次參賽係為咗完成恩人生前嘅夢想,並希望可以呼籲更多人參與器官捐贈。

weiboPhoto from weibo

球隊嘅5位球員都係因為獲得湖南長沙市16歲少年「葉沙」(化名)捐出嘅器官而重獲新生,葉沙非常鍾意打籃球,可惜喺2017年4月27號因為腦出血而不幸離世。

weiboPhoto from weibo

weiboPhoto from weibo

葉沙嘅父母諗起呀仔嘅夢想係成為醫生,加上覺得只要器官仍然運作,就相當於葉沙仍然喺世上,所以都同意捐出葉沙嘅器官。葉沙嘅眼角膜、心、肝、肺同腎分別捐咗俾7個病人。

葉沙以另一種方​​式留喺世上,佢生前曾經夢想可以同職業籃球員一齊比賽,所以其中5位受贈者特意組成「一人籃球隊」,參加中國女子籃球聯賽全明星賽。

weiboPhoto from weibo

呢隊「一人籃球隊」成員有:4號嘅周斌(化名),今年54歲,獲贈葉沙嘅肝;1號嘅胡偉(化名),今年50歲,佢獲贈葉沙嘅腎;20號嘅劉福(化名),今年49歲,佢獲贈葉沙嘅肺;27號嘅黃山(化名),今年22歲,獲贈葉沙嘅眼角膜;7號嘅顏晶(化名),今年14歲,同樣獲贈葉沙嘅眼角膜。

5位受贈者組成嘅球隊叫「葉沙」,更以葉沙捐出器官嗰一日,即係「2017427」作為波衫嘅號碼,喺波衫上面亦都印有佢哋各自獲贈嘅器官,球隊仲有留咗一件16號波衫俾葉沙。

weiboPhoto from weibo

weiboPhoto from weibo

而接受咗器官捐贈嘅受贈者其實仍然需要長期服用抗排斥藥,身體亦都未完全恢復,尤其仲有幾位受贈者嘅年紀已近半百,但係佢哋仍然毫不猶豫咁參加比賽,積極鍛鍊身體。

weiboPhoto from weibo

weiboPhoto from weibo

喺WCBA當日,現場播出「一人籃球隊」嘅故事,令全場都非常感動,受贈者都決定喺每年嘅4月27號相聚,一齊紀念葉沙。葉沙爸爸為球隊寫咗一首隊歌《夜夜共眠》,有一句歌詞:「當我在的時候我們素不相識,當我離開的時候我們成了至親至愛」

weiboPhoto from weibo

weiboPhoto from weibo

真係好感動!葉沙雖然已經離世,但佢遺愛人間,救咗7位病人嘅生命,而喺受贈者體內嘅器官都令葉沙以另一種方​​式留喺世上。

Text: Holiday Editorial
(小編公告:如果讀者有任何關於美食、旅遊、玩樂、或者任何新奇有趣事物既資訊,都歡迎話比小編們知~大家可以透過Facebook inbox、或者send e-mail到holiday@presslogic.com,直接將資料傳比小編)

【想隨時隨地緊貼本地食買玩資訊?】

👉🏻 立即下載 HolidaySmart 假期日常APP

👉🏻 即刻Follow我地Instagram holidaysmart.hk

👉🏻 訂閱我地 Youtube Channel