御用保安陳勉良實為國畫聖手 曾到世界各地開畫展!

陳勉良，可能大家聽個名未必知佢係邊個，但講到TVB御用看更/道友，相信大家都有啲印象！佢入行42年，做盡各種小角色，做得最多嘅一定係懶散、卸膊保安同「專業」道友。即使佢做親都係小角色，但每次都做得唯俏唯妙。做咗演員多年嘅佢，其實冇接受過正式嘅演藝訓練，但扮起嘢上嚟，真係唔會輸畀一班視帝！佢曾經拍劇扮道友，點知演得太入型入格，舉手投足都似模似樣，連啲鼻涕都交戲，搞到畀警察截查！

Photo from 《僱傭妻子》

然而，演戲只係佢其中一份工作，佢另一個身分係國畫大師！佢10歲開始畫畫，17歲跟隨名師習畫，兩年後就舉辦咗第一次嘅跟人畫展，功力有目共睹！畫畫59年嚟，曾經喺世界各地舉辦自己嘅畫展，例如美國紐約、新加坡、墨爾本、悉尼、印尼、廣州等，更係獲獎無數，衝出香港，揚威海外！視后米雪、御用嫲嫲李香琴，都係佢徒弟添～

Photo from 《陳勉良網上畫廊》

Photo from 《陳勉良網上畫廊》

除咗演戲同畫畫，陳勉良好識寓工作於娛樂，將興趣變為職業。佢有時會幫劇集畫道具畫，例如《金裝四大才子》、《金枝玉葉》等，又會喺畫畫場面中擔任「替手」，喺鏡頭前寫書法或畫畫，幫補家計，補貼做「茄呢啡」嘅微薄薪金！佢接受傳媒訪問嘅時候表示，佢對呢兩份職業都充滿興趣同責任，所以如果佢知之後嗰日要拍劇，前一晚就唔會畫畫，擔心自己一畫就停唔到，影響第二日拍戲嘅狀態！

Photo from 《金裝四大才子》

即使佢喺劇中飾演一個幾細嘅角色，對白有幾少都好，佢都抱住專業態度，敬業樂業嘅精神，揣摩角色嘅性格、神髓，成功做到做咩似咩。呢份精神非常值得我哋尊敬！

Photo from 網上圖片 

最近，佢喺中環舉辦半世紀回顧畫展，即日起至3月8日～小編都好想近距離欣賞下「道友良」嘅神來之筆！

Text: Holiday Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）