《如果標點符號有性格》 插畫家將標點符號擬人化！「～」絕對係暖男 逗號同句號超曖昧！

喺呢個見面少，多用手機通訊嘅年代，用以表達情感嘅標點符號變得相當重要，萬一用錯標點符點，隨時會為雙方關係帶嚟公關災難啊！而微博一位插畫家麻尾，畫出《如果標點符號有性格》系列，將標點符號擬人化，所有角色性格超合理！而且仲變得相當好笑！

Photo from 微博@麻尾

《如果標點符號有性格》系列將標點符號擬人化後，每個標點嘅角色性格超可愛，首先當然係大家最常用嘅「逗號」同「句號」！而最搞笑係「逗號」同「句號」之間嘅互動，「句號」經常用一句說話KO多嘴嘅「逗號」，感覺工作上好有默契！

Photo from 微博@麻尾

Photo from 微博@麻尾

「逗號」就係不停講嘢，完全停唔到落嚟，感覺非常嘮叨，不過始終係「逗號」啊嘛，講嘢係無終結㗎！而每次見到佢同「句號」之間嘅對話，工作以外就變得超曖昧⋯⋯

Photo from 微博@麻尾

而除咗「逗號」同「句號」，「問號」當然名符其實係一個「問題少女」啊！句句都係問題，完全都以「問號」作結，可以話係一個好奇心旺盛嘅孩子，而「省略號」當然係次次都畀「問號」嘅問題搞到一額汗啦⋯⋯

Photo from 微博@麻尾

而「感歎號」就好似一個時而激動，時而脾氣暴躁嘅大叔？經常性因為小事而發脾氣，不過好彩有個暖男連接號「～」喺身邊，令「感歎號」冷靜落嚟之餘，連「！」下面粒點都變埋心形，究竟佢哋係咩關係⋯⋯？

Photo from 微博@麻尾

喺插畫中「感歎號」應該係大部分標點符號嘅上司，見佢不斷鬧人，「省略號」都識得冷靜面對，而最搞笑係「問號」完全聽唔明。不過最最最驚喜係暖男「～」，一句「不要罵髒話呢親親～」，真係睇到都想打冷震啊！連接號「～」一定係個非常嬌嗲嘅男生！

Photo from 微博@麻尾

而「括號」就係一對孖生兄弟，不過二人性格不一、方向不同，但又要一齊合作先能成大事，非常好笑！呢個設定應該係同標點符號嘅用法有關，有「開括號」自然要有「閂括號」，不過又有好多文字同標點符號夾喺中間，唔會「痴埋一齊」，佢哋擬人化後真係好可愛啊！

Photo from 微博@麻尾

插畫完全係以擬人化方式將標點符號嘅個性活靈活現，睇到好有共鳴又搞笑！平時都唔覺得標點符號咁可愛，唔知日常生活中又有無其他事物同標點符號一樣，擬人化後會變得關係複雜又得意呢？

圖片來源：微博@麻尾

Text: Holiday Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）