「安德CP」獲官方認證! 安仔周嘉洛情人節最想同譚道德過 女神鄺潔楹擇偶條件又係咩?

「安德CP」獲官方認證! 安仔周嘉洛情人節最想同譚道德過 女神鄺潔楹擇偶條件又係咩?

HotTalk 熱門話題
By Presslogic on 14 Mar 2019

《愛回家之開心速遞》嘅熱潮令一眾劇中演員人氣大升!「金城安」周嘉洛同校花「Venus」鄺潔楹就係其中兩位。

Presslogic
Photo from Presslogic

雖然兩位喺劇中或者戲外嘅接觸唔算多,但佢哋一見面嘅時候都會雞啄唔斷,Judy繼續發揮佢主持本色,而嘉洛就延續佢「金城安」嘅性格,非常有火花啊!

Presslogic
Photo from Presslogic

好多人都想知周嘉洛(金城安)會揀吳偉豪(朱凌凌)定係林凱恩(Bonnie),然而嘉洛希望情人節陪佢嘅都唔係佢哋兩個,而係...陳榮峻!係譚道德啊!唔通佢想情人節畀人瘋狂罰抄道德經?!定係想確認譚道德嘅地位啊?

《愛回家之開心速遞》
Photo from 《愛回家之開心速遞》

另一方面,好多網民都個疑問,就係究竟「金城安」蠢啲定係「Terry」蠢啲?周嘉洛就認為係「Terry」蠢啲喎~「因為金城安有時都幾醒目(喺唔應該醒目嘅地方)!」仲囂張咁話:「Terry係一直Keep住蠢咖~」

《愛回家之開心速遞》
Photo from 《愛回家之開心速遞》

自從出咗一集「氹仔」同「金城安」一齊爭「朱凌凌」,見到「朱凌凌」又會幫「金城安」刷牙、幫佢揹背囊,又抬佢上山,最後仲好似氹女仔咁氹番佢,個個都問究竟「金城安」知唔知自己畀「朱凌凌」寵壞?而「金城安」周嘉洛就話畀大家知:「『金城安』並唔係畀『朱凌凌』寵壞,而係畀全家寵壞!但係佢哋(熊家)成日講到佢哋自己唔關事咁~」

《愛回家之開心速遞》
Photo from 《愛回家之開心速遞》

因為「金城安」一角,令周嘉洛人氣急升,唔少網民除咗想知「金城安」最後情歸何處之外,都會想知道周嘉洛本身嘅感情狀態~咁佢就話平時星期六日會打機,然後作狀喊住話「因為我冇女朋友!嗚嗚~」佢又繼續話:「喺我嘅愛情歷史入面,我有女朋友嘅時間,我係冇理過部機咖!」大家都以為係佢女朋友唔畀打機,佢就突然好認真:「唔係佢唔畀打機,而係有段感情喺度,你就會投入段感情,咁就會扔低身邊嘅嘢~」聰明嘅Judy突破盲腸話:「咁你咪唔係做自己囉?」然後就勾起咗嘉洛嘅「傷心事」:「所以最後咪分咗手囉~」

IG@kalok_
Photo from IG@kalok_

對住女神Judy,相信唔少男士都會想知女神嘅擇偶條件。Judy就話,如果要喺「靚仔但廢青」同「樣衰但暖男」兩揀一嘅話,佢會選擇「樣衰但暖男」!因為佢唔太在意外表,最緊要嗰個男仔係對佢好!佢補充:「我好鍾意好似Terry咁單純嘅男仔,心地好重要!~但最緊要有上進心,同鍾意食嘢。」

IG@judy.kwong
Photo from IG@judy.kwong

但係當佢被問到會唔會陪男朋友打機嘅時候,佢就咁答啦:「會陪佢打機,因為自己都充滿好奇心,但前提係個Game要好玩!」仲搞笑話陪打機嘅時間只限1小時左右~作為男士嘅你要識做呢,同到女神拍拖,唔係仲要對住部機啊嘛~

IG@judy.kwong
Photo from IG@judy.kwong

雖然大家成日都見到Judy有時喺《愛回家》客串吓,有時做吓《學是學非》,有時又做吓主持咁,但佢好想嘗試更多唔同嘅事,呢刻最想試嘅就係做大show嘅司儀,「雖然會好大壓力,但都好想試吓!」然後好興奮咁話,佢好想同森美做拍檔,跟佢學吓嘢!嘉洛聽到之後點出咗個重點:「大家終於明點解Judy擇偶要搵個有上進心咖啦?因為佢自己都好有上進心!」

IG@sammy903
Photo from IG@sammy903

題外話:進行訪問之前,兩位90後年輕演員都非常有禮貌咁向在場工作人員打招呼,完全冇架子,非常親民,令small potato小編訪問嘅時候冇咁緊張啊!

Presslogic
Photo from Presslogic

Text: Holiday Editorial
(小編公告:如果讀者有任何關於美食、旅遊、玩樂、或者任何新奇有趣事物既資訊,都歡迎話比小編們知~大家可以透過Facebook inbox、或者send e-mail到holiday@presslogic.com,直接將資料傳比小編)

Holiday長期歡迎大家投稿~我哋會為你開一個個人帳戶作發表文章之用。文章類型包括美食、旅遊、玩樂等同Holiday相關既事物~投稿可以傳送到 holiday@presslogic.com比小編檢查一下先,記住要附上100字內自我簡介。 另外文章一經採用,編輯將會進行潤飾。期待你哋既大作啊!

Follow Instagram: holiday.presslogic


Share to Facebook