陳法拉進軍荷李活拍美劇 同影后妮歌潔曼合作 6集出演4集

陳法拉自2005年選國際華裔小姐得亞軍之後就簽約大台，參演過唔少電視劇。不過2013年約滿後離巢，2014年遠赴美國讀書之後，香港觀眾就好少喺幕前見到法拉嘅演出喇！

陳法拉喺紐約著名學府茱莉亞學院攻讀4年制戲劇碩士課程（Master of Fine Arts），2018年畢業，係呢科嘅第一位華人畢業生。

Photo from 陳法拉 ig

讀完書嘅佢更加衝出香港，進軍荷李活添！

美國HBO之前就公布咗會開拍改編自小說《You Should Have Known》嘅全新迷你劇《The Undoing》，由英國男星曉格蘭特（Hugh Grant）、影后妮歌潔曼（Nicole Kidman）、當奴修打蘭（Donald Sutherland）擔任主演。

Photo from HBO

而喺演員名單入面仲有嚟自香港嘅陳法拉添！劇情講述本來擁有美滿生活嘅治療師（妮歌潔曼飾演），喺即將推出首部作品之際，卻遭到連番意外，丈夫失蹤，令佢人生急劇變化。

呢部美劇一共有6集，而法拉會出演其中4集，角色名叫Jolene，係重要角色，今次佢首度出演美劇，又同影后妮歌潔曼合作，令人期待佢嘅表現！

Photo from iMDb

好期待法拉嘅演出啊！

Text: Holiday Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）