好知己變老公密友！洪永城同好友翠如老公蕭正楠friend過打band～相約齊齊睇演唱會

洪永城同黃翠如friend就大家都知，不時喺節目入面互窒，相識咗超過10年嘅佢哋相處好有默契。

洪永城就曾經喺Facebook發表過同翠如相識10年嘅感受：「同呢位女子原來已經相識10年，有啲嘢會變，有啲嘢永遠都唔會變，冇變嘅係我哋難得嘅工作默契同友誼，呢一種關係好值得珍惜」

Photo from 洪永城 Facebook

正當大家以為佢哋會從朋友成為戀人嘅時候，翠如就公開咗同蕭正楠嘅戀情，佢哋更喺上年台慶公開已婚嘅身分添！

Photo from TVB

而身為翠如知己嘅洪永城知道呢個消息都非常鄧好友高興，更忍唔住抹眼淚，睇得出佢哋真係好friend~

Photo from big big channel

而結婚之後，蕭正楠同黃翠如都融入咗對方嘅好友圈之中，唔單止翠如同蕭正楠好兄弟曹永廉做咗「好姊妹」，蕭正楠都同樣同洪永城成為好兄弟！

Photo from 黃翠如 ig

Photo from 洪永城 ig

新年嗰陣洪永城就有去翠如屋企拜年，翠如仲話：「係你仲未娶到老婆煎蘿蔔糕俾你食之前，我們家都歡迎你，不過娶到老婆之後，就唔好來打攪我地啦。」

Photo from 蕭正楠 ig

Photo from 黃翠如 ig

但最近洪永城同蕭正楠甚至賣甩翠如，結伴去睇演唱會！琴日蕭正楠就喺ig po咗佢同洪永城嘅合照，仲留言：「愛愛愛」原來佢哋一齊去睇方大同演唱會。

Photo from 蕭正楠 ig

洪永城都有喺下面留言：「Love song ❤️」回應返蕭正楠嘅「愛愛愛」，而「正印」黃翠如都有現身留言：「你地兩個玩得開心d啦?」後面個emoji好有深意咁喎！

Photo from 蕭正楠 ig

其實佢兩個單獨約會都唔係第一次，之前都曾經一齊去睇舞台劇。

Photo from 蕭正楠 ig

由自己嘅好知己變埋做老公嘅好兄弟，雖然翠如就叫洪永城娶到老婆之後，唔好嚟打攪佢哋，不過睇得出佢哋嘅關係已經超越咗朋友，昇華到好似一家人咁喇！

Text: Holiday Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）