奈良鹿胃部藏3公斤打結膠袋！小鹿瘋狂誤吃膠袋 愛護會呼籲旅客勿亂餵/亂拋垃圾！

去奈良旅行，當然要去非常出名嘅奈良公園睇鹿鹿啦！除咗打卡影相，仲會有唔少遊客會買鹿仙餅餵鹿鹿，咁做當然開心，不過最近「奈良の鹿愛護会」發現，有奈良鹿因身體太虛弱倒斃，解剖後仲發現逾3公斤膠袋啊！實在令人心痛！

Photo from FB@一般財団法人 奈良の鹿愛護会

奈良公園每日都有大量遊客入內同鹿鹿互動，一班可愛奈良鹿令奈良公園成為必去景點之一，同鹿鹿玩當然開心啦，仲可以打卡影相，餵佢哋食嘢等等，近距離同鹿鹿接觸！

Photo from FB@一般財団法人 奈良の鹿愛護会

不過各位遊客要注意啦，日前「奈良の鹿愛護会」見有奈良鹿倒斃公園，解剖後仲發現鹿鹿胃內有超過3公斤膠袋，而且仲打曬結，嚴重影響鹿鹿消化系統同身體健康啊，相當恐怖！

Photo from FB@一般財団法人 奈良の鹿愛護会

「奈良の鹿愛護会」表示，鹿胃當中藏咁多膠袋，即使鹿鹿食再多嘅食物，都不能被身體吸收、消化，導致鹿鹿身體虛弱，所以大家千祈唔好亂拋垃圾啊！

Photo from FB@一般財団法人 奈良の鹿愛護会

奈良鹿係一種野生動物，不過因生活喺近城市及人群嘅地方，令鹿鹿容易將非食物嘅嘢食落肚，導致健康出現問題。

Photo from FB@一般財団法人 奈良の鹿愛護会

加上由於奈良公園並無設垃圾筒，唔少遊客都會將垃圾隨處亂放，鹿鹿聞到膠袋有食物嘅味道時，就會誤食膠袋，所以大家唔好再亂拋垃圾啦！連膠袋以外嘅垃圾都絕對要帶走處理！

Photo from FB@一般財団法人 奈良の鹿愛護会

另外，餵鹿鹿嘅時候都唔好膠袋連食物比佢哋，咁樣都會令佢哋誤食膠袋㗎！而且亦都唔好餵鹿仙餅以外嘅食物比鹿鹿，咁樣亦會令佢哋食錯嘢而引起健康問題！

Photo from FB@一般財団法人 奈良の鹿愛護会

大家只要行出一小步，勿亂拋垃圾或亂餵食，絕對可以拯救小鹿嘅生命，所以各位到奈良嘅遊客，記得要善待並愛護小鹿啦！

圖片來源：FB@一般財団法人 奈良の鹿愛護会

Text: Holiday Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）