想食咩/去邊都唔駛就人!獨遊7大理由  試咗一次就會上癮

想食咩/去邊都唔駛就人!獨遊7大理由 試咗一次就會上癮

生活熱話
ByRachel Lo on 09 May 2019 Deputy Managing Editor

鍾意獨遊嘅朋友應該都會畀人問過,一個人去好似好毒咁,點解會想自己去旅行?其實去過一次就會明白獨遊嘅快樂,下次畀人問可以畀呢篇文佢地睇!

雖然一個人旅行睇落好似好孤獨咁,其實試過就知自由自在咁,可以話走就走,話飛就飛,話唔定仲會識到新朋友添!如果未試過獨遊,又有少少興趣嘅話,可以睇睇呢篇推介新手獨遊去邊啲城市嘅文章(詳情:推介5個適合第一次獨遊城市

SHUTTERSTOCK
Photo from SHUTTERSTOCK

1. 搶平機票容易啲

唔少航空公司都會突然推出平機票,搶一張都會易過搶兩張,而且搶過平機票都知道旅行日期真係好睇個平機票係搵到咩日子,如果係一個人去就唔駛左夾右夾大家啱嘅期,仲要就埋平機票個日期。獨遊嘅話見到平機票,心動就可以即刻行動~

2. 同朋友夾時間去旅行可能會夾到唔知幾時

上面都有提到,如果係突然好想去旅行,同朋友去就要夾自己同公司同事嘅期,仲要等埋同行旅伴睇睇邊個日期得閒。出到嚟社會,夾日期去旅行係最難,就會令到想去旅行一拖再拖。如果自己一個去就無呢個問題~

SHUTTERSTOCK
Photo from SHUTTERSTOCK

3. 要遇到個好旅伴唔容易

唔少人都話「相見好同住難」,仲有一種係平時可以好friend,但去旅行先見真章,就知道要搵一個好又夾嘅旅伴一啲都唔容易,同埋好難避免計劃行程、旅行分分鐘仲會嘈交,變左去完旅行關係差咗。

4. 想要急嘅行程就急,想hea行就hea行

廣告
廣告

同其他人旅行就要顧及旅伴想急定係想hea,有啲人去旅行要好早起身,想玩盡晒成日;有啲人就鍾意hea遊,瞓夠先去玩。不過同你一齊去旅行嘅旅伴未必同你同type。自己去嘅話,就可以隨時因應唔同情況,甚至靈機一觸話去就去一啲想去嘅地方。

SHUTTERSTOCK
Photo from SHUTTERSTOCK

5. 會更容易識到新朋友

通常一大班人就會比較難認識喺旅程中識到新朋友,但當一個人去唔同景點或入住hostel,就會容易認識到同樣都係獨遊嘅朋友或當地人,都係會成為旅程中嘅意外驚喜。

SHUTTERSTOCK
Photo from SHUTTERSTOCK

6. 想食咩同去邊全部都可以自己決定,唔駛刻意遷就人

同朋友、屋企人或另一半去都會考慮埋大家鍾意食咩、想去邊,好多時就要面對取捨,遷就旅伴就可能無得去自己真正想去嘅地方,造成咗遺憾。獨遊就可以自己鍾意食咩、去邊、玩咩都係自己嘅意思,可以自由啲、輕鬆啲。

7. 可以更加了解自己

自己一個旅行會有更多時間獨處同沉思,會有更多時間同自己對話,同埋可能原本以為自己做唔到獨遊,原來係可以,甚至好enjoy。

Text: Holiday Editorial

(小編公告:如果讀者有任何關於美食、旅遊、玩樂、或者任何新奇有趣事物既資訊,都歡迎話比小編們知~大家可以透過Facebook inbox、或者send e-mail到holiday@presslogic.com,直接將資料傳比小編)

Share to Facebook