同屋企人去旅行總會遇到嘅事！網民大嘆超有同感！

By Ivory on 24 May 2019

Digital Editor

細細個嘅時候，爸爸媽媽永遠唔怕麻煩，成日帶我哋周圍玩。無論佢哋幾攰都從無半句怨言，只要睇住我哋玩得開心，已經覺得好安慰、快樂。爸媽咁錫我地，相信大家細個果陣都會諗，長大後搵到錢，一定要帶佢哋周圍去旅行，等佢哋可以遊歷世界更多地方，享受人生。

Photo from EGL

不過正所謂「理想歸理想」，到大個咗有能力嘅時候先發現一切都唔係想像中咁美好！

1.「日哦夜哦」
我哋無論幾大都好，喺爸媽心目中永遠都當我哋係小朋友，總為我哋操心。即使去到外地，佢哋都會「日哦夜哦」～「去到酒店啲衫都唔好亂擺啊，唔係check out 嘅時候唔記得拎走，漏哂啲嘢我唔會番轉頭陪你拎咖！」

Photo from EGL

有時我哋諗住離開香港，帶父母享受吓生活，所以就帶佢哋食啲貴餐廳。不過佢哋又會唔捨得你洗咁多錢，「啊仔，好貴啊！走啦，唔好食呢間啦！」去到當地嘅小餐廳食嘢，佢哋又怕啲嘢食唔乾淨、怕熱或者怕凍～總之整個trip都聽到佢哋不停碎碎念啦～

2.做咗啊四
同得父母去旅行，你都唔忍心要佢哋自己拎行李，搬上搬落啦！變相你就幫手拎曬所有行李～有時搬完啲行李都攰到散曬～

帶父母去購物，佢哋就好似返老還童咁，見到啲靚嘅衫、得意嘢通通都買～見到佢哋買得咁開心，你就會不知不覺間變咗佢哋嘅「衣架」(將準備試或者試完嘅衫都擺喺你身上)/「購物架」(成手一袋二袋佢哋嘅戰利品)。

Photo from EGL

另一方面，我哋依家可能比父母嗰一代更有條件周圍去旅行，見識比佢哋多，所以好多事，例如book酒店、問路等，都要自己一手包辦。

3.滿足唔曬咁多人
去旅行最易出現意見分歧嘅時間就係一個想行街shopping、嘆吓冷氣；一個就想感受當地文化，去多啲嗰度嘅景點！你做搞手Plan行程嘅時候，一定會受到諸多阻攔，諸多制肘～真係會諗到頭都爆咖！

Photo from EGL

有唔少網民都話自己有相似嘅經歷，同是天涯淪落人咁話！搞到好頭痕，每次去完旅行番嚟，都話唔想再同屋企人去旅行！但講完之後，都係會唔忍心揼低佢哋！

去旅行都係尋開心咖啫，要成功氹掂屋企人，令佢哋「乖乖哋」跟你去旅行，唔係冇辦法嘅，等小編過幾招畀你啦！

1.Plan行程前先詢問家庭各成員意見
旅行前，記得先了解各個家庭成員嘅喜好，而且搜齊佢哋鍾意嘅活動，然後搵少少時間坐低同佢哋傾吓行程，畀佢哋知道你重視佢哋每一個人。之後再同佢哋商量各個活動嘅時間，將唔同性質活動（行街／玩戶外活動／有動有靜）嘅時間，分配得啱啱好！咁就齊齊皆大歡喜啦～

Photo from EGL

2.出發時間唔好set得太早／太晏
相信同過屋企人去旅行就一定會出現一個問題：幾點出發先最好？年長一輩就鍾意將行程編得密密麻麻，越早出發越好，唔好浪費時間，咁先可以玩盡佢，值回票價！相反，一班年輕人（上班一族）就唔想太早起身，覺得去旅行就係要放鬆心情！日日喺到趕行程，仲早起身過平日返工，呢趟旅行又有咩意義呢？

Photo from EGL