文青必去!澳門《永利藝賞──人間樂園》開鑼!矚目藝術品率先睇

文青必去!澳門《永利藝賞──人間樂園》開鑼!矚目藝術品率先睇

澳門旅遊
ByMag on 09 Aug 2019 Digital Editor

放假去澳門玩唔一定淨係行大三巴、食豬扒包嘅,仲可以睇埋藝術!澳門大型藝術盛會「藝文薈澳」最近開鑼,當中由6月至10月舉行嘅《永利藝賞──人間樂園》藝術展就更加係亮點!展覽雲集多件國際知名藝術家嘅大作,包括畫作、裝置同數碼科技等多種形式展示嘅藝術瑰寶,令人目不暇給!就等小編同大家直擊有咩必睇展品啦!

《永利藝賞——人間樂園》係「藝文薈澳」系列活動,展覽靈感源自於文藝復興時期嘅著名畫作《人間樂園 (Garden of Earthly Delights)》。話明係「人間樂園」,顧名思義展出嘅藝術作品都極具特色同美感,觀眾由眼睛到心靈都如同遊走於藝術嘉年華之中!

以下呢幾件作品,就打破傳統創作框框,將藝術揉合不同媒介而成:

《融化的記憶》(Melting Memories)及《澳門流》(Macau Currents: Data Paintings)

何謂「記憶」?「記憶」聽落虛幻,只能想象、難以形容,但媒體藝術家拉菲克•安納度(Refik Anadol)呢件裝置藝術品,就通過腦電圖收集控制認知嘅神經機制數據,以數據油畫、數據雕塑同光線投影創作出呢個「實體化」嘅人體回憶!作品嘅外貌、形狀會好似腦電波一樣不斷變化,奇幻有趣!

《融化的記憶》(Melting Memories)
Photo from 《融化的記憶》

拉菲克•安納度(Refik Anadol)嘅另一件作品《澳門流》,就透過收集澳門30日海平面活動嘅高頻雷達數據,將海洋嘅波濤暗湧以LED媒體牆呈現觀眾眼前!大家可以全新角度去「乘風破浪」,感受不一樣嘅海洋美態!

《澳門流》Macau Currents: Data Paintings (圖左) 及《融化的記憶》Melting Memories (圖右)
Photo from 《澳門流》 (圖左) 及《融化的記憶》(圖右)

《賽倫斯•杜古德》(Silence Dogood)

嘩!成間房都色彩繽紛,超夢幻呀!珍妮弗•施丹琴(Jennifer Steinkamp)創作嘅呢幅大型作品以綺麗嘅動畫投影,去闡釋抽象嘅電流理論大家只要沿住作品遊走,就可以感受到雷雨雲中,由微小嘅冰塵粒逐漸形成威力驚人嘅雷電電流,叱咤雲間。

《賽倫斯•杜古德》
Photo from 《賽倫斯•杜古德》

《聖禮》(Sacral)

《聖禮》望落好似一個半透視版嘅大教堂,飄渺又典雅!藝術家艾杜雅多•特雷索迪(Edoardo Tresoldi)只係運用金屬絲網,就將文藝復興時期嘅教堂建築,透過光影、視覺投射去建造出嚟!呢件集現代同古典元素於一身嘅作品,大家又點可以錯過?

《聖禮》
Photo from 《聖禮》

《巨龍的爪印》(Dragon's Footprint)

高空俯視呢兩個巨龍爪印已經好壯觀啦!其實佢係由中國建築師馬岩松建立嘅MAD 建築事務所(MAD Architects)嘅作品,將神話中嘅巨龍痕跡活現喺都市環境中!龍一直只出現喺傳說故事中,今次大家終於可以喺現實生活「尋龍」啦!

《巨龍的爪印》
Photo from 《巨龍的爪印》

《美國之愛》(The American LOVE)

講到今次展覽中最吸睛嘅,相信非波普大師羅拔•印第安納(Robert Indiana)嘅代表作《美國之愛》莫屬!

呢個巨型版英文字「LOVE」相信大家都唔會陌生,佢亦喺美國、台灣、日本等地公開展出過。不過而家唔駛出國,喺永利澳門都有得睇啦!今次嘅「LOVE」雕塑仲用咗紅、白、藍等搶眼色彩,同朋友一齊影打卡相絕對「呃Like度」爆燈呀!

《美國之愛》
Photo from 《美國之愛》

《精神圖騰》系列("Spirit Totems" Series)

另一個亮點,就係重量級美國藝術家赫伯•亞柏特(Herb Alpert)嘅大作《精神圖騰》系列都駕臨今次展覽!《精神圖騰》系列由數座高達十八英尺、深受西北太平洋土著雕塑形式啟發嘅銅雕,配合榮獲格林美音樂大獎嘅樂曲創作而成,由視覺到聽覺上都氣派十足!

《精神圖騰》系列
Photo from 《精神圖騰》系列

《山姆‧弗朗西斯的歷年畫作》(The Collected Works of Sam Francis)

如果你鍾情抽象藝術嘅話,美國抽象主義藝術家山姆‧弗朗西斯(Sam Francis)嘅畫作絕對係你嘅心水啦!今次展覽精選佢其中四幅抽象繪畫,以別樹一格嘅色彩運用、留白方法同日式美感,去呈現藝術家多姿多彩嘅靈感世界!

《山姆‧弗朗西斯的歷年畫作》
Photo from 《山姆‧弗朗西斯的歷年畫作》

另外,今次參展嘅藝術家可以話係菁英雲集!好似創作《聖禮》嘅米蘭藝術家艾杜雅多•特雷索迪(Edoardo Tresoldi),就被《福布斯》列為三十位最具影響力嘅三十歲以下歐洲藝術家之一。其他藝術家同樣獲獎無數,拉菲克•安納度(Refik Anadol)為微軟研究最佳視覺獎及德國設計獎得主、來自MAD 建築事務所嘅馬岩松曾被外媒選為全球建築界最具創造力10人,而珍妮弗•施丹琴(Jennifer Steinkamp)嘅作品更同過樂隊U2一齊做世界巡迴演出!

難得有展覽俾大家一次過見識到咁多位大師嘅神作,文青們仲唔快啲約埋朋友一齊去朝聖?

《永利藝賞──人間樂園》展覽
日期:即日至10月6日
時間:上午10時至晚上10時
地點:永利皇宮路氹及永利澳門
歡迎公眾免費入場
官方網頁:https://bit.ly/2LfcF2g

Presented By Wynn Palace and Wynn Macau

Share to Facebook