抽埋警察水！《信用欺詐師JP : 香港浪漫篇》有埋香港示威情節～9成香港取景 唔鹹唔淡廣東話會睇到大笑 最後仲幾驚喜+有彩蛋

雖然《信用欺詐師JP : 香港浪漫篇》係由日劇《信用欺詐師》延伸出嚟嘅劇場版，不過就算無睇日劇咁睇呢套電影，都唔會連接唔到。最驚喜嘅係誤打誤撞咁對香港現況抽乾水！

首先講講故事背景先，一向大膽嘅欺詐師達子(長澤正美 飾），拉埋經歷老到嘅欺詐師理查德（小日向文世 飾)同行動力極強嘅欺詐師少爺仔（東出昌大 飾），專程由日本來到香港釣大魚。佢地住劏房、扮街坊，設下多重騙局，誓要騙取香港大企業女帝——「冰姬」劉藍(竹內結子 飾)「信任」，奪取價值連城嘅紫鑽石。但愛情騙子 (三浦春馬 飾)突然介入爭奪巨鑽，而早前被騙走20億黑幫大佬 (江口洋介 飾) 亦現身大報復。

Photo from edko films

Photo from edko films

有睇開《信用欺詐師》就知道劇情會如預告所講，「眼見不一定為實。何謂真？何謂假？」所謂「欺詐師」就係以呃人嚟獲利，而佢地3人組通常好有道義咁只劫富，仲要係大奸大惡嘅有錢人。

Photo from edko films

有留意開日本娛樂嘅人就會知道，呢套戲真係星光閃閃，有長澤正美、小日向文世、東出昌大，仲要有埋竹內結子同三浦春馬添！長澤正美拋開靚女形象，盡情搞笑，而三浦春馬就發揮佢本來嘅靚仔本色，應該會吸引到唔少迷妹。

Photo from edko films

Photo from edko films

可能有好多人睇睇下會覺得情節幾老套，呢套電影同《屍殺片場》有少少異曲同工之妙，係要睇到後面先會明白情節嘅鋪排，同埋發現原來埋咗唔少伏線。

入面有好多搞笑位，好似無啦啦惡搞埋《人鬼情未了》情節，聽講係因為編劇做香港場景資料搜集，發現《家有喜事》都有呢個情節，所以加埋落去。當佢地3個嚟到香港食街邊檔，有個好似《功夫》包租婆嘅身影添！

Photo from edko films

Photo from edko films

好多係香港人睇到先會知嘅笑位，同埋發現製作單位「無心插柳」咁抽咗香港現況嘅水，唔小心好應景咁抽到乾塘。

Photo from edko films

而呢套日本電影同一般喺香港取景嘅外國電影唔同之處，係真係用咗幾多香港實景取景，好似香港仔珍寶海鮮舫、油麻地廟街茶餐廳、尖沙咀梳士巴利道、尖沙咀文化中心觀景台、九龍海逸君綽酒店天台、灣仔稅務大樓、鰂魚涌海山樓、土瓜灣益豐大廈、北角春秧街等。

Photo from edko films

Photo from edko films

Photo from edko films

Photo from edko films

Photo from edko films

Photo from edko films

呢啲場景除咗令香港人睇完份外有親切感，仲會睇到日本眼中嘅香港原來係咁靚。而情節間唔中就出現啲唔鹹唔淡嘅廣東話，尤其喺電影入面話係香港人嘅角色，一開口講廣東話，香港人聽到真係會忍唔住笑住咁講，「咩料啊……」變咗幾多位係香港人先識得笑～

Photo from edko films

一開始就講起金鐘示威情節，為表達對大財團女帝劉藍不滿，大批群眾發起示威，不過點示威極對劉藍都係毫無影響，睇到會不自覺聯想起香港連日嚟嘅示威活動，第一下會苦中作樂咁笑咗出嚟。

Photo from edko films

Photo from edko films

劇情上仲會見到大批警察嘅工作，就係不斷保護大財團話事人劉藍。仲會去到佢間別墅好似保護重要政要咁多重保護佢，甚至到後期情節見到劉藍可以指揮一大班警察幫佢，相信就算外國嘅觀眾睇到都會諗，「原來香港警察會做呢啲……」而香港觀眾唔駛講，感受一定會更加深，諗唔到套戲會默默咁抽咗香港警察嘅水。

Photo from edko films

Photo from edko films

不過要講呢個系列嘅特色就係會係後面畀驚喜觀眾，扭橋再扭橋，甚至有唔少彩蛋，畀到唔少驚喜觀眾，所以後段要留足眼力睇。好似發現有幾個好出名嘅日本明星，竟然有喺入面友情客串，當見到佢地出現會驚叫出嚟，因為估唔到咁出名嘅明星，都願意喺呢套電影做戲份唔多、甚至曇花一現嘅角色。

Photo from edko films

《信用欺詐師JP : 香港浪漫篇》於7月25日正式上映。

Text: Holiday Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）