有個Plan行程嘅旅伴好幸福！計劃行程嘅5大難處 要係大家都滿意嘅行程～仲要排得順同計好列車時間

一直都會聽到唔少人講要搵個好旅伴唔易，因為相見好同住難，所以話一齊去旅行係見真章。如果你嘅旅伴仲會plan行程，咁就真係好幸福，皆因plan行程一啲都唔容易。

1. Book住宿要諗過度過
因為又要諗個住宿交通方唔方便，地理位置係咪就到晒咁多日行程，如果要book多個地方，就要再做research。仲要格下價、睇下評語，睇下大家啱唔啱，睇埋會唔會係「鬧鬼之選」！剩係揀住宿都咁複雜，揀住宿就要諗定粗略嘅行程，即係出發前1個月都要開始準備。

Photo from presslogic

2. 要揀大家都ok嘅行程
一齊去旅行，大家喜好總有唔同，要砌到個行程係大家都無異議，其實唔簡單，排得太緊密或太得閒，都可能唔適合大家，一個唔小心就可能畀大家怪。

Photo from presslogic

3. 要check好列車時間
雖然去旅行嘅行程唔駛話每分鐘都計到好準確，但列車時間就真係要出發前就check好，因為無睇到時間分分鐘要等成個幾鐘先會有下一班，甚至好似日本咁好早就尾班車，到時miss左要返去就煩。變咗plan行程嘅朋友去前要做足功課，睇定列車班次。

Photo from presslogic

4. 排順路嘅行程唔容易
將大家想去嘅景點串聯埋一齊，要排得順路唔容易，仲要諗埋中間有咩交通工具可以搭，真係要花唔少心機去排。

Photo from presslogic

5. 同預期有落差可能會畀人怪
有時計劃行程前睇咗資料，總會預期好靚或好有趣，但去到發現好失望嘅時候，就可能會被黑面，而plan行程嘅朋友就會唔好受。

其實一大班人plan行程就最好～不過如果有旅伴肯負責咁艱巨嘅任務，咁真係幾幸福！

Text: Holiday Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）