宵夜好去處！沙田全新小食街〜營業至凌晨1點 黑椒烤豬手/泰式美食/港式小吃！

沙田友又多個宵夜好去處喇！全新開幕嘅FRESHALL沙角市場位於沙田沙角街，以森林樹木為設計主題，入面除咗有街市雜貨，仲設有超過十間食店嘅小食街，由港式街頭小吃、泰式船湯河、車仔麵到台式飲品等等都有！而且小食店營業至凌晨1點，街坊們夜晚去食翻個宵夜都係個唔錯嘅選擇！

好煮意
主打藥膳養生米線，以「一年四季都啱飲嘅養生湯底」作賣點。 人氣 NO.1 招牌藥膳醉雞米線（$48）湯底以當歸、川芎、白芷、黨參等熬製超過5個鐘，醉雞十分入味〜酒香鮮豬雜米線（$48）豬雜腍滑入味，有咬口，充滿濃濃酒香味。佢嘅自家製辣椒同豉油都好惹味〜

Photo from Presslogic

Photo from Presslogic

寶泰
主打泰式美食，由泰國大廚主理。 招牌菜係青咖哩豬扒飯，香濃椰奶中和咗微辣嘅青咖哩，再配上充滿肉汁嘅豬扒，值得一試 。泰式手撕雞撈檬嘅手撕雞十分嫩滑，檬粉汁酸甜度適中，檬粉乾爽有口感。呢到仲有近10款泰式小食，好似沙爹串燒、炸香茅雞全翼、香煎辣魚餅、咖哩角拼春卷等。

Photo from Presslogic

豐味豬手
主打西式焗製肉食，配上秘製醬汁，每日新鮮製造！蜜糖黑椒烤豬手嘅豬皮薄身鬆脆，肉質較軟嫩，加上蜜糖嘅甜同黑椒嘅香，送飯一流！

Photo from Presslogic

Photo from Presslogic

川香閣
主打四川風味菜色，招牌重慶酸辣粉使用重慶正宗配方，薯粉煙韌有咬口，配料惹味。

Photo from Presslogic

Photo from Presslogic

腸粉王
主打腸粉、香港街頭小食。其中腸粉每日新鮮製造，加上秘製醬汁，軟滑之餘帶點米香。雞蛋仔都有原味、朱古力味兩款選擇！

Photo from Presslogic

Photo from Presslogic

手作功夫茶
飲品方面有源自台中嘅新晉台飲店手作功夫茶，佢地以高成本嘅優質蜂蜜代替果糖，感覺更健康！鎮店之寶38奶霸，用料及口感豐富，鐵觀音奶茶配上黑糖波霸珍珠、仙草同蒟蒻等 3種材料。芝士奶蓋抹茶採用來自日本宇治縣嘅濃醇抹茶粉，配上人氣大熱嘅芝士奶蓋，帶玫瑰鹽鹹味，好吸引呀！

Photo from Presslogic

包點先生
主打中式包點同中式點心美食，所有產品每早新鮮製造。宜家仲有全新登場嘅極致．流沙奶皇包！外皮鬆軟，鹹蛋味濃郁，十分推薦！

Photo from Presslogic

燒賣王子
主打自家手工燒賣同各款港式小食，仲推出咗全港首創黑、白燒賣〜每日新鮮現包，墨魚汁燒賣嘅墨魚味道都幾濃郁，燒賣好爽口〜

Photo from Presslogic

名店車仔麵
主打車仔麵、香港街頭小食。香辣雞翼尖由 B 仔配方再改良，香辣惹味，係宵夜嘅好選擇！仲有祖傳秘方碗仔翅，碗仔翅足料，湯底香濃，值得推薦〜

Photo from Presslogic

玲食蜜語
主打手工櫃桶腸粉，仲有出面比較少見到嘅家鄉小米、生菜牛肉餅同扁食湯〜

Photo from Presslogic

Photo from Presslogic

Photo from Presslogic

FRESHALL 沙角市場
地址：新界沙田沙角街 5 號沙角市場
營業時間 : 星期一至日 營業至凌晨 1 時

Text: Holiday Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）