download HolidaySmart 假期日常 app
今季大受好評日劇!《凪的新生活》察言觀色地迎合大家  無咗自己亦得唔到認同!寫實到令人心酸 但又有少少窩心同搞笑

今季大受好評日劇!《凪的新生活》察言觀色地迎合大家 無咗自己亦得唔到認同!寫實到令人心酸 但又有少少窩心同搞笑

生活熱話 電視電影
By Rachel Lo on 15 Aug 2019
Deputy Managing Editor

最近如果心情比較沉重,可以睇下日劇舒緩下。上季日劇都有一套講職場嘅日劇《我要準時下班》討論度極高,而今季嘅《凪的新生活》大受好評,兼因講中唔少人心聲、幾寫實之餘,仲有講出睇落賤男、實質未必係賤男;睇落溫柔、每次都講你想聽嘅說話,但未必係好男人。

故事大約講女主角凪(黑木華飾)係個會察言觀色,睇人地眉頭眼額再講出大家想聽嘅說話,或做出大家期許嘅行為。

TBSPhoto from TBS

所以係職場上佢經常包同事底,做好多濕濕星星嘅工作,只為融入到同事嘅圈子,好似同同事影相,明明同事揀咗佢影到最醜樣個張,都唔敢開口講post另一張相。其實佢好介意同事會唔會約出去玩唔叫佢,好介意自己係咪被排除在外,先好努力迎合大家。

TBSPhoto from TBS

另一方面,人緣好嘅公司皇牌Sales慎二(高橋一生飾)原來係凪嘅男友,但一直都無公開,一齊嘅時候又唔多關心凪。有次因為同事又將雜務推畀凪做,但畀凪發現原來佢地將啲嘢畀晒佢做,3個人出去玩,仲話同佢夾唔嚟,而佢又任勞任怨,所以塞晒畀佢做。

TBSPhoto from TBS

正當佢好失落做咁多嘢去遷就大家,最後都無被接納,知道男友都加緊班,想搵佢一齊收工,聽到男友話同佢一齊都係因為性生活夾,令到佢大受打擊暈倒,然後突然辭職搬家,唔再聯絡同事、朋友、男朋友,遠離市區生活,搵返自己。

TBSPhoto from TBS

TBSPhoto from TBS

其實可以係凪身上睇到好多人嘅影子,為咗被接納,不斷遷就、睇人眉頭眼額、猜測點樣回答先係最好答案。失去自我之餘,亦無融入圈子中。

TBSPhoto from TBS

當睇到凪為咗迎合男友鍾意女仔柔順直髮嘅喜好,每日清早靜靜雞爬起身,將自然鬈到好似爆炸頭咁嘅頭髮夾直整直。好多嘢默默付出,但無人感謝或認同,令到佢辭職,想放自己一個假。而身邊嘅人到無咗佢先發現原來佢做咗好多嘢,睇到會有少少心酸。

TBSPhoto from TBS

劇中帶出一個問題,當渴望得到認同,從而察言觀色睇氣氛做人,無咗自我同畀人搓圓撳扁咁,但到頭來都係換取唔到成為一份子。

情節上仲帶出幾個幾有趣嘅情況,亦都會喺現實發生,「睇落好渣嘅渣男,可能好專一;睇落好溫柔細心,卻未必係個專情好男人」當大家睇到之前一齊嗰時,凪嘅前度慎二對佢好差咁,大男人又唔係大家面前認佢係女友。

TBSPhoto from TBS

走到郊區搵凪,一見面就笑佢嘅裝束同天然鬈髮型,到凪叫佢唔好嚟後,佢講咗句會再嚟,好瀟灑咁轉身走。但原來係一路行,一路喊到好似個小朋友。

TBSPhoto from TBS

到佢飲酒同酒吧侍應、調酒師喊住講起初初同凪拍拖,見佢半夜爬起身默默整直啲頭髮,就心底裡發誓要好好守護呢個女仔,個反差會令人眼濕濕,睇落好賤男咁,原來係好似小學生專蝦鍾意嘅女仔咁。

TBSPhoto from TBS

明明好鍾意凪,覺得解釋「沙甸魚論」嘅凪好可愛,但把口就好衰咁話離群沙甸魚無鬼用,往往就係唔將真心話講出嚟,令凪唔明白佢,二人無法心意相通。

TBSPhoto from TBS

相反凪搬屋後嘅新鄰居昆(中村倫也飾),開頭好似同來歷不明嘅人來往嘅古惑仔咁,但佢對凪又好溫柔,讚令凪自卑嘅天然鬈髮型可愛,仲會好易同人拉近距離,令到佢唔小心令好多女仔為佢傾心。好似對凪好好咁,亦令凪開始有好感,但慢慢發現一啲跡象佢並非好似表面咁好……

TBSPhoto from TBS

不得不說3位演員都演得好好,好似黑木華就演出女主角個種搖擺不定,成日顧慮人地點諗、咩答案先會令大家鍾意,明明有自己嘅想法,為咗迎合大家嘅想法,壓抑自己感受,做出同大家相似嘅選擇,膽小怕事嘅OL。

TBSPhoto from TBS

而高橋一生演嘅慎二一開頭好似當女友係洩慾工具,又唔公開關係,令人覺得佢好賤男款,但到後來喊到成個細路咁嘅演技,成功將觀眾對呢個角色嘅印象大扭轉。

TBSPhoto from TBS

中村倫也就好成功咁扮演到一個笑容燦爛,容易相處,令人想接近,同埋摸唔清佢諗緊咩嘅鄰居。

TBSPhoto from TBS

而家睇落去好難猜測到底凪最後情歸何處,到底係好笨拙但好鍾意凪嘅慎二,定係溫柔得嚟又風流嘅昆?而佢係咪又可以搵返自我、脫離到無業遊民行列?唔少網民指好難站CP,因為兩個男角色都各有各好,同埋出現新角色都令人難以估計劇情發展。

暫時嚟講,《凪的新生活》既會令人有共鳴,而且寫實到有時有啲心酸,但亦有窩心搞笑嘅地方。如果最近想抽離一下現實睇睇劇,呢套日劇係唔錯嘅選擇。

Text: Holiday Editorial
(小編公告:如果讀者有任何關於美食、旅遊、玩樂、或者任何新奇有趣事物既資訊,都歡迎話比小編們知~大家可以透過Facebook inbox、或者send e-mail到holiday@presslogic.com,直接將資料傳比小編)

【想隨時隨地緊貼本地食買玩資訊?】

👉🏻 立即下載 HolidaySmart 假期日常APP

👉🏻 即刻Follow我地Instagram holidaysmart.hk

👉🏻 訂閱我地 Youtube Channel