全港多區萬人合唱《願榮光歸香港》！戴頭盔眼罩演奏 再創管弦樂團合唱版！

近幾個月香港資訊爆炸，更加係瀰漫住一股壓抑、低沉嘅氣氛。有見及此，早前有一眾音樂人自發創作咗一首名為《願榮光歸香港》嘅歌，結果一曲響遍全港，有唔少網民聽得感動落淚，更大讚係「香港之歌」，係一首「真正屬於香港人嘅歌」啊！

《願榮光歸香港》一曲迅速成為唔少香港人常掛嘴邊嘅歌，更有網民自發於9月10日喺香港大球場，香港對伊朗世界盃外圍賽中，大合唱此曲，場面相當震撼！

Photo from IG@lsb.co

其後唔少香港人響應網上自發活動，於18區各商場、戶外地方，亮起電話燈，大合唱呢首《願榮光歸香港》！結果史無前例地響遍多區商場，當中包括沙田新城市廣場、荃灣廣場、淘大商場、鑽石山荷里活廣場、觀塘APM、馬鞍山新港城中心、屯門市廣場、黃大仙廣場、將軍澳PopCorn、葵芳新都會廣場、上水廣場、旺角MOKO等等，合計分分鐘有成萬人有份大合唱！

Photo from IG@shatin_commons

Photo from IG@shatin_commons

而喺尋日，一群香港文化藝術工作者更將呢首《願榮光歸香港》進化成管弦樂團及合唱團版，當中演出嘅音樂人都戴上口罩、眼罩、頭盔演奏，場面同樣震撼，有人仲笑說「而家先發現戴口罩都可以吹樂器」！

Photo from YouTube 《願榮光歸香港》

Photo from YouTube 《願榮光歸香港》

唔少網民大讚係「最強版本」、「係從來都未有過嘅歸屬感，眼淚不自覺咁流」，亦有網民認為「儘管不能認同你們所做的全部事，但我不得不佩服香港人為自由的崇高理想和人民的質素」。

Photo from YouTube

Photo from YouTube

有份製作嘅音樂人表示，「我們相信將音符凝聚，能譜成樂章。將樂章傳頌，能凝聚眾人」，相信都能為香港近日低沉氣氛，帶嚟一線希望，無論任何立場、睇法，音樂都能夠凝聚持同一理念嘅人。

Photo from YouTube 《願榮光歸香港》

Photo from YouTube 《願榮光歸香港》

中秋節又到，同樣有唔少網民自發到18區公園、商場慶祝，屆時都可以舉燈大唱《願榮光歸香港》，不過今個中秋港鐵將不提供通宵列車服務，慶祝時記得注意交通及安全啦！

圖片來源：IG@lsb.co、《願榮光歸香港》、IG@Shatin_commons

Text: Holiday Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）