中秋節港鐵無通宵列車！安全考慮下只加密班次 歷年首次不提供通宵服務！

港鐵每年都會於中秋節、新年、聖誕及除夕等大型節日提供通宵列車服務，務求讓市民於節日玩得盡興，即使夜一夜都依然有車安全返屋企。聽日就係一年一度中秋節，港鐵更首次宣布於中秋節期間，將唔會提供通宵列車服務啊！

今年因反送中運動關係，市民不滿港鐵疑多次與警察合作，使唔同港鐵站設施多次受破壞，最近更有網民發起「跳閘活動」。中秋將近，港鐵隨即宣布明天中秋節當日將按正常服務時間提供列車服務，並按正常時間關閉，換言之中秋節無通宵車搭啦！

Photo from MTR

港鐵表示，近日與政府相關部門因最近社會情況，作出風險評估，基於安全情況下，決定不提供通宵服務，但多條港鐵綫(除機場快綫、迪士尼綫)會由下午3點起加完班次，以應付於節日期間乘客量急升問題，呢個安排絕對係歷年首次！

Photo from MTR

中秋節(9月13日)當日，港島綫、荃灣綫、調景嶺往何文田、北角往將軍澳及北角往寶琳，將會於3點至5點時段維持約2分鐘一班，晚上11點至服務完結時會改為4分鐘一班。而何文田往黃埔、南港島綫、香港往青衣、西鐵綫及馬鞍山綫，將會於3點至5點時段維持約3-5分鐘一班，晚上11點至服務完結時，何文田往黃埔、南港島綫、西鐵綫及馬鞍山會改為4分鐘一班，而香港往青衣服務暫停。

Photo from MTR

而北角往康城於下午3-5點為6.7分鐘一班，晚上11點後服務暫停；香港往東涌下午3-5點為4-8分鐘一班，晚上11點後改為6分鐘一班；東鐵綫時間亦有會隨唔同路綫而有所改動。

Photo from MTR

一年一度大型節日當然要玩得盡興啦，不過大家於今個中秋想玩夜啲嘅話，記得要搵定其他交通返屋企啦！

圖片來源：MTR

Text: Holiday Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）