日本皇室飼養嘅寵物都係流浪貓狗 雅子皇后愛心爆棚以領養代替購買

日本天皇德仁日前正式登基，佢嘅家庭亦備受關注。除咗雅子皇后同皇女愛子內親王之外，仲有皇室成員都好受矚目。

呢班皇室成員就係由天皇一家飼養嘅皇家寵物喇！佢哋都係由天皇一家領養返嚟！

愛子公主一向都中意動物，所以皇室都養咗唔少寵物。其實喺愛子公主出世之前，天皇同皇后就已經養咗兩隻狗，分別叫「皮皮」同「瑪莉」。

Photo from Pinterest

當年一隻流浪狗喺赤坂御用地生咗10隻狗仔，宮內廳職員拎走咗其中8隻，天皇同皇后夫婦就收養咗最細嘅兩隻狗BB。

佢哋更多次喺公開場合提到自己養嘅狗狗，天皇就試過喺生日記者會上話：「放狗散步對身體健康有好多好處。」而雅子皇后亦表示狗狗可以幫助調解夫妻之間嘅感情。

Photo from Pinterest

不過皮皮同瑪莉都已相繼離世，依家嘅皇室第一犬就係2009年收養嘅「由莉」，今年已經10歲，不時同皇室成員一齊出現。

Photo from Pinterest

喺德仁天皇一家去御料牧場時，當時仲係BB嘅由莉都有跟隨，一直俾愛子公主抱住，雅子皇后更喺車入面舉起由莉嘅肉掌向車外揮手示意添！

Photo from Pinterest

Photo from Pinterest

除咗由莉之外，皇室仲有養貓貓！愛子公主有一日喺赤阪御所發現咗一窩喵星人，於是即刻將佢哋送去動物醫院，之後愛子公主決定領養貓媽媽同一隻貓BB，愛子公主嘅同學仔亦領養咗另外3隻貓寶寶。

Photo from Pinterest

之前愛子公主抱住愛貓出席記者會，有眼利記者認出貓貓唔係之前收養嗰隻，原來愛子公主又領養多隻貓貓！

Photo from Pinterest

其實雅子皇后都非常中意小動物，佢曾經喺赤阪御所兩次遇到受傷嘅狐狸，將佢哋送到動物醫院進行治療，喺訪問時遇到小動物都會耐心同佢哋交流，雅子皇后真人美心善啊！

Photo from Pinterest

支持領養代替購買！

Text: Holiday Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）