與愛寵齊齊取暖！日本新出主人寵物共用毛氈 溫暖程度加倍！

大家覺唔覺最近天氣開始變涼呢？已經到秋天，大家啲冬裝可以準備好啦！

除咗出街要著多幾件衫外，有時喺屋企耍廢、睇電視、玩手機嗰陣都想冚返張被，或者毛氈保暖㗎！

而屋企有養寵物嘅朋友都知，冬天時主子捐入被窩，會更加溫暖～

日本NITORI最近新出咗一款毛氈，最大賣點就係可以俾大家同主子一齊用！！

Photo from NITORI

毛氈上面有一個類似多啦A夢百寶袋嘅袋，可以俾主子捐入去，好似冚咗張被咁～個袋嘅兩側仲有位可以俾大家放隻手入去取暖添！

根據官網說明，要先將毛氈圍喺腰上，坐底後拉開個「百寶袋」等主子捐入去，再放手入袋嘅兩邊，據講咁係最佳姿勢！

Photo from NITORI

因為唔止主人同寵物都夠暖，取暖同時仲可以同主子玩，增進感情，一舉兩得！主人低頭仲可以望到寵物瞓覺嘅萌樣，超治愈～

按照個袋嘅size，喵星人係最適合，但有網友試過將屋企嘅兔兔放入，都非常啱size，細隻嘅小型犬都可以。

Photo from NITORI

成張毛氈嘅size係130cm × 70cm，售價係2,027円（税込），一共有兩隻色，喺官網有得賣。

Photo from NITORI

冬天同主子一齊冚毛氈取暖，暖笠笠程度大大提升！不過唔知大家家中嘅主子會唔會咁安份捐入個「百寶袋」度，同大家一齊取暖呢？

Text: Holiday Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）