日本便利店關東煮將消失 FamilyMart改用袋裝發售 明年將淘汰

日本係香港人熱門嘅旅遊地點，日本除咗景點多之外，其實食嘅都好豐富！

講到日本美食，就不得不提日本便利店！入面賣嘅絕對唔係劣食，飲品、麵包、蛋糕、熟食都好出色！

而日本便利店仲有最最最吸引嘅—關東煮！！！

Photo from PressLogic

喺便利店入面用熱辣辣嘅湯浸住各種關東煮食材，冬天食一碗，個身即刻暖笠笠～

不過嚟緊呢款小食可能要被淘汰喇！因為日本3大便利店Lawson、FamilyMart同7-11宣布會考慮調整關東煮服務。

Photo from PressLogic

而FamilyMart更已率先將關東煮改為袋裝，預先煮好，8件只售213円。雖然價錢好平，但就失去咗自己揀食材舀起嘅風味，味道同之前都有分別。

Photo from ANNnewsCH

其實便利店都有佢哋嘅考慮，因為關東煮步驟繁複，唔同嘅食材煮熟時間有所不同，好似竹輪、魚丸要9個鐘，雞蛋就要16個鐘，便利店職員要分幾次加入材料。

Photo from PressLogic

而且亦有衛生問題，之前就曾爆出有店員將關東煮放入口再吐返落鍋中，又有老鼠等，令人擔心關東煮嘅食物安全問題，而包裝好嘅關東煮就相對衛生好多。

Lawson同7-11都俾加盟店自行考慮喺唔喺店內賣關東煮，FamilyMart出年1月就會全面取締，推出可以用微波爐加熱嘅新關東煮。

Photo from PressLogic

大家想食關東煮，就要把握最後機會喇！

Text: Holiday Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）