催淚彈或含致癌物二噁英 一文睇曬食咩可減低體內二噁英損害

催淚彈或含致癌物二噁英 一文睇曬食咩可減低體內二噁英損害

時事熱話 生活熱話 健康資訊
ByHeidi on 18 Nov 2019 Digital Editor

最近有立場新聞嘅記者證實長出「氯痤瘡」,懷疑係因為催淚彈內含有二噁英所致。二噁英係一種有毒物質,攝入大量二噁英可致氯痤瘡,嚴重更會影響免疫系統、生殖功能,甚至致癌。

二噁英健康催淚彈氯痤瘡致癌飲食
Photo from 環保署

環保署一直都有公開二噁英嘅量度數據,但網站只顯示截至今年9月嘅數據,未有10月數據。

二噁英健康催淚彈氯痤瘡致癌飲食
Photo from Shutterstock

人類會透過食物、食水、空氣等攝入二噁英,最近營養師Mandy Wong 就喺自己嘅專頁撰寫文章,詳細講咗食咩食物可以減低體內二噁英嘅損害,俾大家做參考。

二噁英健康催淚彈氯痤瘡致癌飲食
Photo from Shutterstock

1. 維他命A、C、E
Mandy提到有研究講過,二噁英會增加體內氧化反應,產生多咗活性含氧物 (ROS),同時減低身體嘅抗氧化功能,所以血液中嘅維他命A、C、E水平亦有可能下降。因此,佢建議如果接觸過二噁英,可以增加攝取維他命A、C、E,因為呢三種維他命係抗氧化物,仲可以增強免疫力,食多少少都OK,但唔好食過量。

二噁英健康催淚彈氯痤瘡致癌飲食
Photo from Shutterstock

維他命A食物:紅蘿蔔、南瓜、番薯、羽衣甘藍、菠菜等。
維他命C食物:柑橘類水果(柑、橙、西柚、檸檬)、 士多啤梨、奇異果、生番茄、綠葉蔬菜、苦瓜、青椒
維他命E食物:綠葉蔬菜、全麥穀物,包括:全麥麵包、全麥麵條、果仁,尤其杏仁、蛋黃

二噁英健康催淚彈氯痤瘡致癌飲食
Photo from Shutterstock

2. 硒質(Selenium)
因為吸入二噁英同樣會降低血液中硒嘅水平,但硒質本身屬很強嘅抗氧化物質,而硒蛋白大部分亦係抗氧化酵素,可以令細胞不易受游離基傷害,有助身體保持對抗癌症及心血管病應有的抵抗力。肉類、海鮮、果仁都含較多硒質,但Mandy最建議食嘅係巴西果仁(Brazil nuts),因為巴西果仁嘅硒質係眾食物之首,食一粒,已經夠1日嘅硒質所需。但係巴西果仁都幾肥下,所以唔洗食好多,每日食2-3粒都好夠!

廣告
廣告

二噁英健康催淚彈氯痤瘡致癌飲食
Photo from Shutterstock

3. 薑黃素(Curcumin)
薑黃素除咗有好強抗氧化功,亦有助舒緩炎症。Mandy亦都引述咗一份實驗研究,指出薑黃素好有可能有效地預防亞慢性「二噁英」暴露(subchronic TCDD exposure)。佢話一般薑黃粉已經含有薑黃素,將1/4-1/3茶匙薑黃粉加落smoothies或者用嚟加入炒飯、湯、奄列等都可以。薑黃粉唔止可以抑壓一種致癌物質,仲可以增加肝臟一種排毒酵素。但Mandy亦提醒切勿過份地攝取,因為薑黃粉含有高濃度草酸鹽,易有腎石人士就要注意份量,不宜大量攝取。

二噁英健康催淚彈氯痤瘡致癌飲食
Photo from Shutterstock

4. 白藜蘆醇(Resveratrol)
Mandy話有研究顯示,口服白藜蘆醇或有助對抗二噁英。含較豐富白藜蘆醇嘅食物唔係好多,有大家可能較熟悉嘅紅酒,其發酵嘅紅提子皮就含有白藜蘆醇,不過,紅提子都有,唔一定要飲酒。其次,花生都含有白藜蘆醇。

二噁英健康催淚彈氯痤瘡致癌飲食
Photo from Shutterstock

5. 槲皮素(Quercetin)
Mandy話長期吸入二噁英會損害生育功能,有研究指出槲皮素(Quercetin)有助老鼠預防由二噁英引起嘅睪丸損害 (TCDD-induced testicular damage)。槲皮素屬黃酮類一種,可以保護細胞之餘亦可增加體內抗氧化物「穀胱甘」水平,保護細胞免被自由基侵襲。槲皮素廣泛存在係植物性食物當中,例如:紅蘋果、紅提子、洋蔥、西蘭花、羽衣甘藍、莓類、綠茶等。

二噁英健康催淚彈氯痤瘡致癌飲食
Photo from Shutterstock

Mandy最後亦再次提醒二噁英會積聚係身體,唔係咁易話排就排,但可以留意飲食,減低其損害。佢亦唔建議食營養補充品,認為只要食啱食物,就已經可吸收足夠營養素。

感謝營養師Mandy Wong文章授權~

Text: HolidaySmart Editorial

(小編公告:如果讀者有任何關於美食、旅遊、玩樂、或者任何新奇有趣事物既資訊,都歡迎話比小編們知~大家可以透過Facebook inbox、或者send e-mail到holiday@presslogic.com,直接將資料傳比小編)

Share to Facebook