【新年禁忌2020】盤點15項過年絕對唔做得嘅事　除咗忌沖涼洗頭、買鞋仲有啲咩？

時事熱話生活熱話

By Celia on 17 Jan 2020

Digital Editor

每個中國傳統節日中都有好多唔同嘅禁忌！而嚟緊嘅農曆新年當然唔例外喇～

新一年大家都想行番個好運，新一年順順利利，咁就要記住以下嘅傳統新年禁忌喇！

大年初一禁忌最多
1. 忌催人起床
難得有假期，打工仔們當然想瞓多啲、瞓晏啲啦！各位長輩們喺大年初一，記得唔好用全名催人起身啊因為咁樣會令對方新一年事事都會被人催促，同樣唔吉利啊！

Photo from shutterstock

2. 早上忌沖涼洗頭
「年初一唔可以洗頭」呢句說話相信大家都唔陌生啦！其實係因為「洗」同「死」讀音相近，感覺唔吉利，而且「髮」同「發」讀音相同，如果喺大年初一洗頭，感覺就有洗走財運嘅意思。若果想新一年財運亨通，大家唯有忍一日唔好洗頭啦！

Photo from shutterstock

3. 忌清潔：掃地及洗地、倒垃圾、洗衣服
新一年當然要將所有運氣通通留低啦！由於傳統而言每家每戶都有運氣留於家中，如果喺大年初一打掃嘅話，就有將運氣、財神掃走之意。而且傳統上較傾向「年廿八洗邋遢」，所有打掃、洗潔工作應該喺年廿八完成！

Photo from shutterstock

4. 忌睡午覺
新一年唔洗拜年嘅「懶瞓豬仔」，記得都唔好喺年初一瞓午覺啊！咁係由於古時有「禁晝寢」，勸人唔好懶散，如果喺大年初一瞓午覺，就會有新一年做事散慢、影響事業運之意㗎啦！

Photo from shutterstock

5. 忌煮新飯、食稀粥、食藥
年初一煮嘢食都有禁忌㗎！如果喺新一年食稀粥，就會有種「窮人食唔起飯」嘅感覺，會令新一年整年都貧窮，影響財運。

Photo from shutterstock

年初一其實都唔建議煮新飯，應該要食除夕剩餘嘅過年飯，寓意有飯吃不完，年年有餘！仲有就係除非生病，健康嘅人依日絕對唔適宜依補藥，如維他命丸都唔好。

6. 出嫁女兒忌初一、初四、初五回娘家
已出嫁嘅女孩子初一、初四、初五最好都避免回娘家，否則傳統上會為娘家帶嚟整年衰運，最好就初二、初三回娘家！

Photo from shutterstock

年初二成雙成對

7. 忌送禮送單數
嚟到初二當然咩都一對對就緊要啦！出嫁女兒回娘家忌送單數回門禮，所以除咗要兩公婆回娘家外，女婿帶返娘家嘅禮物都記得要成雙成對啦！

Photo from shutterstock

年初三赤口日
8. 忌出門拜年
相信大家都知道年初三稱為「赤口」，容易禍從口出，所以盡量唔好初三出門拜年，以免容易有口舌之災啊！

Photo from shutterstock

年初四迎接灶王爺
9. 忌外出
年初四係傳統民間嘅接神日，需留喺家中接眾神明、灶王爺以及家神嚟守護家人，而且傳說中灶王爺仲會點名㗎！所以大家想得到神明保佑，記得初四唔好出街啦！

Photo from shutterstock

年初五送窮日
10. 忌積蓄垃圾
初一到初四嘅垃圾為「財氣」，但到初五以後，垃圾便會變成「窮氣」。因此，初五要將過年期間所有嘅垃圾清掃乾淨，為之「送窮」，可帶來好運與財運。

Photo from shutterstock

年初七人日
11. 諸事不宜
初七是「人日」，人們要互相尊敬，家長唔好教訓小朋友。另外，初七亦係「七煞日」，諸事不宜，盡量不要出遠門。

Photo from shutterstock

年初九玉皇大帝誕日
12. 忌曬衣服
年初九為天公生，即是玉皇大帝誕日，當天忌曬衣服。

Photo from shutterstock

過年期間禁忌
13. 忌買鞋
新年初唔好買鞋相信有唔少人都知㗎啦！因為「鞋」同「唉」相近，如果喺過年期間買鞋，就會有一整年都「唉唉聲」之意，感覺諸事不順又唔吉利。所以即使睇中心意鞋款，最好都係過咗初十甚至下個月先好買啦！

Photo from shutterstock

14.忌使用利器
傳統上利器有「破」嘅意味，可以破財、破運氣，因此喺新年期間要避免剪頭髮。說起「破」字，新年都要避免講唔吉利嘅說話，例如「死」、「病」、「輸」、「窮」、「破」等字眼。若不慎犯禁，應該立即吐唾沫，說「童言無忌」等話語化解。

Photo from shutterstock

15. 忌穿黑、白服飾
黑、白色衣物係中國傳統上為喪服顏色，雖然而家已經成為百搭款式，不過新年期間都係少穿為妙啦，以免畀長輩覺得唔如意啊！而新年當然身上帶有紅色係最好啦！如果覺得紅色衣物難以穿搭，不妨帶紅色畫家帽、紅襪子、紅袋子等，低調得嚟又有節日氣氛，又或者穿橙色、大地色系嘅衣物一樣非常好睇又唔怕比人話啊嘛！