【武漢肺炎】蔣麗芸分享蒸口罩短片以解燃眉之急 紅十字會:「口罩只能用一次!」

由於武漢肺炎持續升溫，而家全城一罩難求。之前就有報道指藥房同市民執二手口罩賣，令人感到憤怒同嘔心。但係面對口罩供不應求，市民又可以點樣面對呢？

立法會議員蔣麗芸(Ann)於日前(29日)就喺Facebook專頁分享一段「抖音」影片，題目係「抗疫最前線」。片中有自稱係傳染博士嘅「吳盟」就話口罩有三層，質料可以抵受攝氏100度高溫，指可透過紫外線或高溫消毒口罩。

Photo from 抖音

Photo from 抖音

蔣麗芸分享短片時就寫道:「當口罩供應短缺時，高溫蒸汽消毒可解燃眉之急。」

帖文直到今日(30日)下午1時多，已獲得超過1萬個留言，大批網民就認為高溫並唔可以殺死病菌，更直指Ann姐無衛生意識，唔好再分享短片害人。

其後蔣麗芸再次發文，表示短片所介紹嘅「總比不戴口罩上街好」方法係「沒辦法中的辦法」、仲強調「最理想是政府能盡快解決口罩荒的問題，以解市民之憂」。

Photo from Facebook

而香港紅十字會今日就喺Facebook發帖，澄清以上謬誤，並指:「口罩只可用一次、係一次﹗使用過嘅口罩必須妥善棄置，以免沾染及散播病毒。」

Photo from Facebook

Text: HolidaySmart Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）