【武漢肺炎】澳門規定市民乘搭公共交通工具必須配戴口罩 否則可被拒載！

武漢肺炎全球肆虐，唔少國家都採取適當嘅防疫措施。澳門多個交通部門今日就宣佈，市民乘搭交通工具時必須配戴口罩，否則司機有權拒絕你上車！

今朝，澳門交通事務局宣布從今日中午12點開始，因應「新型冠狀病毒肺炎」疫情持續，為咗車長同乘客健康著想，凡乘搭巴士都必須戴上口罩！唔戴嘅話，車長有權唔畀你上車！

Photo from HolidaySmart

過咗1個鐘左右，再宣布除咗乘搭巴士要佩戴口罩之外，搭的士都要！否則司機有權拒載！當局呼籲市民自律，同時要加強個人衛生！

Photo from HolidaySmart

而12月先開通嘅輕軌，今日已經實行縮班安排！星期一至四嘅班次10至15分鐘一班；星期五至日及公眾假期就8至15分鐘一班。澳門輕軌同日宣布所有乘客必須戴口罩，否則車站人員絕對有權拒絕市民乘搭！另外亦會加強車廂同車站嘅清潔及消毒！

Photo from HolidaySmart

澳門海事局喺下晝3時17分又再宣布，所有客船嘅乘客喺航程期間必須全程佩戴口罩，否則船公司有權拒絕乘客上船／請佢落船。海事局指，已要求各單位採取最高級別嘅防疫措施，包括各個客運碼頭嘅管理公司同清潔公司必須按照衛生局嘅指引，加強清潔消毒碼頭公共設施，以及調節冷氣系統，加強碼頭內嘅空氣流動；針對船公司方面，海事局要求各間船公司人員做嘢嘅時候需要佩戴口罩，加強清潔消毒船艙，並且一定要提供酒精搓手液同口罩畀有需要嘅乘客使用。

Photo from HolidaySmart

呢段時間過澳門嘅你哋要留意啦！唔好面懵懵畀人拒載都唔知咩事～不過呢段時間，都係戴口罩穩陣啲！

Text: HolidaySmart Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）