【武漢肺炎】直擊！日本口罩搶購現況無良大陸商人大量存貨超高價發售！(內文附日本易買口罩地點）

By Cynthia Wong on 10 Feb 2020

Digital Editor

武漢肺炎愈來愈嚴重，有唔少香港人可能一早已買機票去日本，又或者因為要工作而必需飛日本，都會想睇睇有無可能於日本買到口罩幫補一下。記者於2月4-9日因工作關係於日本大阪停留數日，為大家直擊一下口罩購買情況～(大家記得千萬唔好囤貨，日本人都好難買到口罩啊！）

無良商人超高價發售
於大阪想買口罩，其實又唔算太難，因為有唔少新開嘅日本藥妝店以超高價發售口罩。記者入去睇過日本橋附近藥妝店睇過，店員操超流利普通話，拍攝時老闆更加喝止「不能拍價錢！」，相信是無良大陸商人囤積口罩取暴利！

Photo from Holiday Smart

大國藥妝買到退稅先可加購
而心齋橋、戎筋橋附近有多間大國藥妝，都定時會有口罩發售。不過口罩就不能直接購買，有部分分店規定要買到退稅金額(5,000円）先可以加購2-5包，每包5個(價錢為 298円），如果大家要買藥妝的話，建議可以group埋於同一間買晒佢，就可以加購喇～

Photo from Holiday Smart

部分藥妝店不定時補貨
大部分藥妝店都會有口罩出售，不過就當然係一上架就會賣晒啦！所以建議一行過藥妝店就入去望望有無口罩，記者成功於心齋橋同天滿站嘅藥妝店搵到，一人限購一件記得好好遵守啊～另外，有啲藥妝店會將口罩製成套裝一set set賣，可能 4,000円包一條披肩、2細包口罩及一盒30個嘅口罩，銷售手法層出不窮，其實計落又不算貴，大家都可以考慮看看～

Photo from Holiday Smart

最易購買點：100円店！
好多人都可能會miss 咗，其實除咗便利店、藥妝店之外，100円店係比較容易買到口罩嘅地方。記者成功於岡山站商場，以及黑門市場內的Daiso入手，大家都可以search一下附近會不會有100円店喇～

Photo from Holiday Smart

另外，有部分藥妝店會發售無產地、無成份、無標示防護功效的口罩出售，大家千萬唔好一見到口罩就太開心而馬上入手啊！日本市面上好多口罩都只係防細菌，比較難搵到防病毒，如果真係搵唔到都只能將就頂住，同時都唔好大量搶購，因為日本人本身都已經好難買到口罩，要好好遵守一人買一件的規則，寧願多行幾間睇睇都唔好對當地市面追成困擾。當然只戴口罩係遠遠不夠，大家記得要勤洗手同進行消毒，做好個人衛生啊！