唔止拍片教抗疫！C AllStar陳健安孖好友自發組隊上山執垃圾　望大家體諒清潔者辛苦

香港因為新冠肺炎疫情持續，唔少打工人都因為home office同口罩短缺嘅關係，好多時星期一至五都會留喺屋企工作，一到假日就會去郊外地區行吓，放低口罩呼吸吓新鮮空氣。

但唔知大家仲記唔記得早前就有報導指部分行山人士欠缺公德心，唔止亂拋垃圾，令水樽、紙巾、膠袋等遺留喺郊外，更無視警告字牌，照樣闖入。

當然亦會有好心人專程登山清理垃圾喇～

而早前喺IG拍片教大家抗疫嘅組合C AllStar成員陳健安（On仔），依日就上傳咗佢啱啱過去嘅周末約咗好友齊齊行獅子山嘅相。

Photo from on_callstar@IG

On仔就有感而發咁喺IG撰長文，指自己係第一次行獅子山，但今次就唔係只去行山放空，而是相約好友及一班熱心人專程去清理部分山友遺留嘅垃圾。

Photo from on_callstar@IG

Photo from on_callstar@IG

On仔指佢哋一行十多人，各自分工，準備垃圾袋、鐵夾、手套等等，行咗20分鐘左右，就已經見到有唔少垃圾，On仔指當時第一個反應係：「嘩，咁快打大佬？心入面開始盤算，真係執？然後又諗，越無人行入去就更加要走入去執，總要有人去執，況且今日目標清晰，唔係嚟嘆風景。」

Photo from on_callstar@IG

佢指佢哋喺依個point一個約有大半個人高嘅垃圾袋，就已經差唔多執滿咗七成，最大問題係佢哋成個行程預計仲有三小時，頭20分鐘就已要負重十幾磅行上去，On仔喺依個時候便知道今次係一趟辛苦之行呀！

Photo from on_callstar@IG

最後佢哋一共行咗4個鐘成功登頂，喺沙田坳落山途中又見到一個斜坡下面有大量垃圾，雖然On仔指佢同好友都好想清理，但因為太污糟，加上佢哋冇眼罩，唔夠裝備嘅情況吓，只好放棄。

Photo from on_callstar@IG

On仔最後其亦不忘呼籲大家真的要「請自行帶走垃圾」：「希望大家理解多啲，每個崗位面對嘅困難同心理關口，互相尊重之外，行為上都有所改變，例如有啲膠樽係出現喺危險斜坡上面，清潔者就會因為我亂拋，而要面對呢個跌落山嘅風險。」

在 Instagram 查看這則貼文

⛰今日第一次行山執垃圾之後，我覺得自己好污糟。 . 事緣係咁， Van:「喂，不如行山執垃圾？」 我:「好呀?。」 . 就係咁，Van就負責去統籌，例如揀路線，就要諗吓大家嘅能力，因為一行十幾人，又唔知大家有無行山經驗等等，又例如準備gear，買垃圾袋、夾夾、手套等等。 . 好記得行到20分鐘左右，到第一個point，有舊大石，大家可以休息一下，然後向下一睇，嘩，咁快打大佬？心入面開始盤算，真係執？然後又諗，越無人行入去就更加要走入去執，總要有人去執，況且今日目標清晰，唔係嚟嘆風景。 . 冇諗過大半個人咁高嘅垃圾袋咁快就滿左七成，然後又開始諗，執到幾時？ 「個袋滿哂咪走囉。」 先廿分鐘，咁快就7成，預計仲有三粒鐘行，負重十幾磅咁行，好辛苦喎。 然後就將垃圾平均分開，每人都拎啲，好在人多，而大家都好明白事理。 . 行左四個幾鐘左右，接近尾聲，喺沙田坳落山途中見到一個斜坡下面有大量垃圾，我同魚佬估計過有路行落去，諗住盡執，到真係行埋去，發現好污糟，又有好多飛飛，確定我哋自己無眼罩，唔夠gear，就唯有放棄。 . 真係尾聲喇，大家負重幾個鐘都好攰，問題又嚟，要搵垃圾站，行左差唔多半個鐘先搵到，搞掂，亦唔該垃圾站姐姐咁啱開門俾我哋掉垃圾。 . 最後我覺得自己從頭頂到腳趾尾都好污糟，好想返屋企即刻沖涼，又唔想搭任何交通，因為覺得自己污糟，怕整污糟人哋㗎車，乜都怕。 . 講咁多都係希望大家理解多啲每個崗位面對嘅困難同心理關口，互相尊重之外，行為上都有所改變，例如有啲膠樽係出現喺危險斜坡上面，清潔者就會因為我亂拋，而要面對呢個跌落山嘅風險。 . 最後， . ⚠️「請自行帶走垃圾」⚠️ . . #初登獅子山 #大自然下人人平等

On Chan 陳健安（@on_callstar）分享的貼文 於 PST 2020 年 3月 月 1 日 上午 6:50 張貼

另外，On仔仲上傳多個IG Story，其中佢拎住隻夾喺度一邊講「垃圾」一邊搵嘅Story，好似叫賣緊咁添～

Photo from on_callstar@IG

最後嘅最後真係要好似On仔話齋各位行山人士記得請自行帶走垃圾呀！

Text: HolidaySmart Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）