康文署室內運動場明日重開！但不適用籃球、排球等隊際活動～

前排香港嘅武漢肺炎疫情頗為嚴峻，好多政府機構都要Home Office，部分公共場所，例如運動場、體育館都要暫時關閉！最近疫情開始穩定落嚟，部分康文署設施，如室外場等喺上星期二已經開返！康文署喺啱啱過去嘅星期六就宣布室內運動場喺聽日（今星期三）重新開放！琴日可以開始預訂10日內嘅康樂體育設施！

香港唔少市民都要做運動嘅習慣，自從體育館、運動場暫時關閉之後，大家都叫苦連天～依家重開，大家終於可以重拾久違打波嘅快樂～不過，為咗控制人流，避免人多聚集而提升感染機會，康文署採取隔球場／隔球道／隔球枱咁開放，即係原本有8個羽毛球場，相信依家只能用到4個，唔係全部開放晒畀大家使用！

Photo from LCSD

如果鍾意打籃球、排球等隊際運動嘅你，就要等多一排啦～因為康文署指：籃球場、排球場、投球場等、活動室（包括設於多用途壁球場內）、舞蹈室、健身室、兒童遊戲室、自修室、運動攀登牆、美式桌球室（包括設於多用途壁球場內）、順利邨體育館嘅桌球中心同體操訓練場、鯉魚門體育館嘅散手訓練場以及北河街體育館的搏擊中心就要繼續關閉，直至另行通知～

Photo from LCSD

Photo from 康文署

相信唔少人一知道重開嘅消息，都會非常踴躍去book 場！只能夠話，室內場比關閉前更難預訂了～真係手快有手慢冇～

雖然室內場重開，但更衣室同沖身設施仍然暫停開放～冇得沖涼嘅話，大家記得帶多套衫替換啦～

Text: HolidaySmart Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）