鄭中基再捐口罩搓手液畀清潔工友和拾荒者籲多關注小型慈善機構！

By Ivory on 19 Mar 2020

Digital Editor

新冠肺炎（俗稱武漢肺炎）全球肆虐，全球嘅抗疫物資都變得短缺！有啲人有需要但一直都搶唔到口罩～鄭中基早前生日嘅時候，就親自採購包裝送貨，將口罩送畀長者同基層！今次，佢除咗捐口罩同搓手液畀社福機構，轉贈基層、清潔工友、拾荒者等，亦呼籲清潔公司善待員工，提供合資格嘅口罩畀清潔工人！

Photo from IG@tinyesyes

鄭中基非常關注服務基層嘅慈善機構，佢話：「因為我哋想像唔到社會上唔同階層係點樣面對疫症！」。要透過同基層市民直接接觸嘅慈善機構，可以聽到好多小故事，同理解到佢哋嘅困難。鄭中基近日亦喺社交網站IG同Facebook發長文呼籲大家只要做多步，就可以幫到更多人！

Photo from IG@tinyesyes

「（長文，大家要俾啲耐性睇）
今次嘅口罩同酒精搓手液分別捐咗俾關懷貧窮學校拾平台以及工業福音團契IEF。同以往一樣，我哋唔想捐完就算，希望大家認識資源冇咁充足嘅小團體，因為我哋想像唔到社會上唔同階層係點樣面對疫症。透過同慈善機構聯絡，我哋聽到好多小故事，同理解到佢哋嘅困難。

Photo from IG@tinyesyes

關懷貧窮學校同拾平台主要針對基層，今次主要做嘅係直接落街派發物資俾清潔工友以及拾荒者— 面對呢次疫情中最危險嘅一群。工友口罩消耗量大，而清潔公司又提供唔到足夠口罩。佢哋希望持續派發俾呢啲有需要嘅對象，除咗係價格問題外，工時長都令佢哋無法周圍撲口罩。大家都可以去佢哋專頁去了解吓啲工友嘅生活，有能力就出一分力啦。

Photo from IG@tinyesyes

另一間機構係工福，服務對象係貧窮家庭同老人家。今次疫症中，佢哋親身進行家訪（門外），派發抗疫物資、食物、日用品，同教佢哋點樣消毒、洗手、戴口罩。所以我哋額外再訂啲糧食俾工福，希望減少外出就可以減少口罩用量。意想不到嘅係，工福依家處理緊SIM卡捐贈，由於小朋友停課，有啲家庭本身唔夠設備做網上教學。現今社會你以為上網係最基本嘅事，其實唔係。