【意大利疫情】意大利每2分鐘就有1人死於武漢肺炎 醫護冇手套照做 口罩戴足1星期！

新冠肺炎（俗稱武漢肺炎）重擊意大利！直至當地時間，有接近5500人死於肺炎，超過5.9萬人確診！確診人數暴升以及死亡人數持續上升，令意大利醫療系統嚴重崩潰，喺醫療物資極之缺乏下，醫護仍要繼續工作，導致至今有23個醫生殉職，接近5000名醫護確診！殉職醫生生前表示，佢要喺冇手套下工作！

根據鏡報報道，意大利疫情之嚴峻，平均每2分鐘就有1人死於武漢肺炎！只計當地時間3月21日，單日就有793人因患疫情而逝世，即係每個鐘就有33人死亡，數量多得好恐怖！亦係從24小時起計死亡人數增加幅度最大嘅一次。有城市更要以軍用卡車運屍體去火化、有教堂入面放滿等待火化嘅屍體等，情況令人非常擔憂！

Photo from AP

另外，CNBC報道指意大利衛生部公佈，截至當地時間3月22日下午6點，至少有5,476人死於武漢肺炎。從3月15日起，每日新增病例超過3,000宗，最高單日增加6,557宗，累積個案多達59,138宗！

Photo from 美聯社

唔少外國媒體揭示，因為意大利死亡人數極多，而貝加莫火葬場已經持續每日24小時工作，一日亦只能火化25具屍體！因為無辦法消化咁多具屍體，所以出動當地軍方，動用軍力用卡車協助運屍體去鄰近地方火化！

Photo from 路透社

Photo from 網上圖片

疫症當前，首當其衝嘅一定係前線醫護！

Photo from Shutterstock

同一時間太多人感染，加上長期On call，身體嘅抵抗力已經越嚟越支持唔到！而且，當地醫護保護裝備非常短缺，以往一個口罩通常用半日，但依家醫護要用夠1星期！有受感染殉職嘅醫生生前接受訪問時表示，「冇晒手套都要照做」！當地自疫情爆發以來已經有23名醫生殉職。根據衛生部數據，超過4800名醫護感染武漢肺炎。

Text: HolidaySmart Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）