日本任天堂宣布所有switch主機暫停出貨 供不應求日本都冇得賣！

因為新冠肺炎（武漢肺炎），唔少打工仔都要Home Office~再加埋限聚令，放假都冇得出街，唯有喺屋企打吓機，玩吓最近超Hit嘅「動物森友會」，同朋友打造屬於自己嘅世界。

Photo from nintendo

但壞消息嚟啦，未買Switch嘅人，可能有段時間都買唔到，要搵其他嘢做嚟消磨時間啦！

日本任天堂琴日透過官方Twitter宣佈， Switch主機本體（包括《集合啦！動物森友會》特別版主機）同Switch Lite 都唔會喺呢個禮拜出貨，而之後嘅出貨安排就稍後決定及公佈！不過已經預訂咗嘅就唔受影響～

Photo from nintendo

任天堂上星期曾表示，受武漢肺炎疫情影響，喺中國工廠生產嘅Switch主機等設備嘅製造同運輸都延遲，美國同歐洲都努力為大家加緊生產進度，但情況仲未有改善。

唔少市民喺呢段時間都希望可以買到遊戲機同遊戲，《動物森友會》、《健身環大冒險》、《Just Dance》等可以消磨時間嘅遊戲就變得更搶手，所以就出現供不應求嘅情況！唔好話香港冇得玩，就連日本都冇得賣啦～

Photo from nintendo

今次唔知又要炒到幾錢啦:'( 之前買咗嘅你絕對做咗人生最正確嘅決定！

Photo from tenor

Text: HolidaySmart Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）