情同父子阿笨志村健3次窮追緊抱《天才！志村動物園》只剩阿笨！

今年復活節長假期冇得周圍玩，唯有喺屋企煲下劇。煲劇煲到個人呆呆濟濟，不如睇返之前嘅搞笑綜藝節目《啊笨與啊占》！

《啊笨與啊占》2006年喺香港開播後，廣受歡迎，一到播出嘅時間，總係一家大細坐定定等睇，帶畀大家好多歡笑！

志村健生前主持嘅寵物節目《天才！志村動物園》（天才!志村どうぶつ園）做咗16年咁耐～4年前鬥牛犬阿占就率先離開，今年志村健亦因為患新冠肺炎（武漢肺炎）走埋，《志村動物園》就只係得返啊笨！

Photo from 天才！志村動物園

Photo from 天才！志村動物園

節目組喺上星期播出「園長」志村健嘅紀念特輯，其中一段係志村健完成外景拍攝之後，同志村健情同父子嘅黑猩猩阿笨三度跑上前道別，好似一早知道以後冇機會再見到志村健一樣，場面令人不捨同難過～

Photo from 天才！志村動物園

志村健拖住阿笨隻手，將佢交返畀動物園園長打算轉身離開之際，阿笨就立刻追上去！志村健一邊揮手，一邊話：「仲會再見咖，bye bye啦」。點知阿笨繼續衝上前，甚至攤喺地下「賴死唔走」，志村健摸摸佢個頭，再摸摸佢嘅頭安慰佢：「好啦，真係要走啦，byebye」。阿笨最後都係繼續跑上前跟住志村健，更發出嗚嗚嘅哽咽聲！佢見到啊笨三番四次追上去，都忍唔到手，直接抱起阿笨，拍拍佢以示安慰！其實志村健自己都好唔捨得，佢抱起啊笨嘅時候，眼濕濕咁！阿笨更係直接抱住志村健嘅頭，極之唔願意畀佢離開！

雖然志村健已經離開咗我哋，但我哋可以睇返佢嘅節目，拾回兒時回憶，重溫佢帶畀我哋嘅歡樂！

每集阿笨同阿占都要出街進行唔同嘅任務，阿笨就相對上聰明啲，好多時畀錢，搵路都係佢負責！不過佢哋經常喺執行任務嘅途中出現小意外，例如佢哋好興奮咁走嘅時候，成日將買咗嘅嘢跌咗喺街，見到佢哋嘅互動，嘴角就會忍唔住向上翹，場面溫馨有趣！

Photo from 阿笨與阿占

Photo from 阿笨與阿占

Photo from 阿笨與阿占

Text: HolidaySmart Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）