瑞典王妃自願到醫院做義工！半裸模特經歷備受爭議 積極行善終獲國民認同

講到皇室成員，香港人可能對英國皇室同日本天皇比較熟悉，其實仲有好多國家仍有皇室。

瑞典王妃索菲亞王妃最近將親自上前線，到醫院做義工，負責清潔打掃同下廚煮飯。

面對新冠肺炎（武漢肺炎）疫情衝擊，醫院人手不足，瑞典王妃完成短期訓練課程後，自願到Sophiahemmet醫院工作。

Photo from Sophiahemmet IG

目前醫院無接收新冠肺炎的確診案例，索菲亞王妃同其他義工們都唔會直接接觸到患者。王妃嘅主要工作係協助醫生同護士，幫手消毒醫院器材、到廚房下廚，以及負責打掃清潔醫院。

索菲亞王妃喺嫁入瑞典王室之前曾經做過性感模特兒，令佢同王子嘅婚姻備受爭議，但佢多年嚟積極行善終獲瑞典國民認同。

Photo from shutterstock

索菲亞王妃2004年曾為瑞典雜誌拍攝過上半身僅用蟒蛇遮住重要部位嘅半裸相片，亦曾參加真人騷節目《天堂酒店》（Paradise Hotel）。

所以當時佢同瑞典王子嘅戀情曝光後引起外界激烈討論。佢以前嘅經歷被傳媒翻出，好多人都唔明點解瑞典王位第三繼承人會愛上佢。

Photo from shutterstock

雖然外界對索菲亞討論不斷，但相戀5年後，索菲亞正式嫁入瑞典王室，成為王妃。

婚禮上佢嘅紋身同臍環亦成為焦點，令佢飽受輿論。但瑞典王子喺公開場合多次同妻子秀恩愛，加上索菲亞以皇室身分出現，著裝走優雅知性路線，近年又積極參與慈善工作，漸漸獲得國民認同。

Photo from Daily Mail

佢喺2016年、2017年分別誕下兩名王子，一家四口過得非常幸福。

Photo from Prinsparet IG

瑞典公共衛生局公佈，截至當地時間4月16日下午2時，瑞典全國累計12540宗新冠肺炎（武漢肺炎）個案，累計死亡個案1333宗。

身為王室成員，索菲亞王妃自動請纓上前線抗疫，希望可以為國出一分力。

Text: HolidaySmart Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）