【動物森友會】行動不便媽媽生前沉迷動物森友會 仔仔遺憾自己察覺唔到媽媽愛意！

動物森友會最近瘋魔全球，有網民諗返起當年舊版《動森》推出時，有位韓國網民嘅洋蔥故事！

韓國網民「LoLiel」2005年嘅時候喺網上日誌到提到，當年《動物森友會》一出嘅時候，佢就好興奮買咗，仲叫埋行動不便嘅媽媽一齊玩！教識咗佢媽媽起樓之後就上癮了，仲玩得沉迷過佢哋！

Photo from 網上圖片

佢媽媽身體唔好，患上小兒麻痺症，大部分時間都只能留喺屋企，仲需要用輪椅代步，所以佢媽媽就好鍾意呢個遊戲，感覺就係佢可以喺呢個虛擬世界入面，重獲自由，想去邊就去邊！

直到佢同細佬玩到厭，媽媽仲非常投入，所以就笑佢仲花咁多時間起唔同嘅建設～媽媽當時每日都好堅持收集晒所有化石等嘅收集品，仲好努力還清遊戲入面嘅貸款添～

Photo from 網上圖片

無幾耐，媽媽身體轉差，就冇辦法繼續玩，最後仲離開咗人世！仔仔本身都唔記得咗呢個Game，但隔咗年半之後再登入返，先知道當初媽媽咁沉迷玩呢個Game 嘅原因，充滿洋蔥！

登入咗個Game 之後，仔仔就同《動森》居民閒聊幾句，交代返點解佢同媽媽咁耐都冇嚟玩！然後就走去信箱收信，呢個動作本來係《動森》好平常嘅舉動，點知畀佢發現意想不到嘅驚喜！

原來信箱塞滿佢媽媽寄畀佢嘅禮物同信！每封信都係寫住差唔多嘅說話：「想你了～希望你會喜歡這份禮物。最愛你的媽媽。」

仔仔嗰刻先發現，媽媽之所以咁沉迷，花咁多時間去玩呢個Game，為嘅就係想可以攞到多啲禮物，送畀自己～

Photo from 網上圖片

媽媽可能想補償仔仔現實生活中做唔到嘅嘢。因為行動不便，加上嗰陣網上購物又唔流行，唔可以親自挑選禮物送畀仔仔，所以就想喺遊戲入面，用呢個方式表達自己對仔仔嘅愛！

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）