【行山黑點】飛鵝山自殺崖屢現意外 5大安全行山要點 免累己累人！

最近，有外籍男女喺飛鵝山自殺崖玩「疊羅漢」，重演周星馳同張曼玉喺《家有囍事》入面嘅經典動作「巴黎鐵塔反轉再反轉！」，唔少網民狠批佢哋不負責任：「出事唔好打電話叫消防救！」、「冇事咪型囉！有事咪累己累人囉～」。同日，亦有行山人士喺嗰度墮崖身亡！

Photo from 香港行山遠足之友

漁護署早前就整理咗17個行山黑點，共通點都係難度高，唔係所有人都適合行！容易出事嘅地方主要分2種：潮濕石澗+陡峭懸崖峭壁！
1.大城石澗 
意外原因：落大雨嗰陣，會出現兇猛洪水，容易遇溺；要攀澗，一跣腳就好易出事！

Photo from 漁護署@郊野樂行

2.獅子山山頂 
意外原因：走出獅頭打卡影相／欣賞風景失足！

Photo from 漁護署@郊野樂行

3.蚺蛇尖
意外原因：登山路段佈滿碎石，崎嶇難行！而且沿路無樹蔭，烈日當空下好易中暑！

Photo from 漁護署@郊野樂行

4.四疊潭
意外原因：貪玩跳水淹親！

Photo from 漁護署@郊野樂行

5.燕子岩
意外原因：攀岩失足跌落海！

Photo from 漁護署@郊野樂行

6.撿豬灣
意外原因：沿岸綑邊行，水漲時路況險峻，岩石因海蝕而變得脆弱，容易墮岩！

Photo from 漁護署@郊野樂行

7. 新娘潭瀑布
意外原因：瀑布頂岩石三尖八角，而且濕滑兼有碎石，容易跣腳！好多行山人士為欣賞瀑崖嘅風景，不惜一切！

Photo from 漁護署@郊野樂行

8. 狗牙嶺
意外原因：多咗人行，有啲石變得鬆散，或變碎石！加上地勢險要，非常陡峭+狹窄，只能容納一人「手腳並用」爬住過，山脊兩邊係懸崖，一個唔小心就會跌落深谷。

Photo from 漁護署@郊野樂行

9.水澇漕
意外原因：要經過潮濕石澗、瀑布同水池，好易跣親墮澗！

Photo from 漁護署@郊野樂行

10.黃龍坑
意外原因：崎嶇難行，石澗多而且縱橫交錯，澗道又陡峭險要，容易跌落石澗！

11.彌䃟石澗（彌勒山郊遊徑附近）
意外原因：要攀岩，石面極斜、無手位，只能用雙手嘅力向上爬！

12.仙姑峰石崖（馬騮崖）
意外原因：攀過僅容納一人嘅幾米陡峭高崖，一不留神就會跌落山！

Photo from 漁護署@郊野樂行

13.屏南石澗
意外原因：雨天行石澗會被洪水沖走！或因踏上潮濕石頭而滑倒！

Photo from 漁護署@郊野樂行

14.大大石石澗
意外原因：攀石澗失足跌落水潭！

15.吊手岩
意外原因：吊手岩西脊植被較少，山路崎嶇險要，斜坡陡峭，石階巨大，又多碎石，攀岩時要手腳並用！曾有消防員因就被困行山人士而殉職！

16.飛鵝山石崖（自殺崖）
意外原因：地勢險要多斜坡、石壁同碎石！一跣腳就會直墮崖底！

Photo from 漁護署@郊野樂行

17.彌䃟石澗（摩天崖）
意外原因：唔少人欣賞石澗，不惜冒險攀崖！地理位置潮濕，好易失平衡！

Photo from 漁護署@郊野樂行

Photo from 漁護署

除咗要小心以上行山黑點，做個負責任個嘅行山客，有5點你要知！

1.出發前要做好充足準備
行山前記得搵定行山路線，減低蕩失路機會。另外要留意當日天氣，落雨或者能見度低嘅日子就盡量唔好行山！同埋要著適合當日天氣嘅衣著同鞋，以免中暑或出現低溫症嘅風險！最緊要就係準備充足嘅食物同水，咁就唔會因為能量不足而暈低喺山頭！仲有差電器，唔好畀自己嘅電話無電，走失咗都可以同其他人聯絡！

2.勿隨地拋垃圾，自己垃圾自己帶走
唔隨地拋垃圾就基本嘅！保持衛生，大家都行得開心啲！無人想行垃圾山咖嘛～行山嘅時候，請好好保護大自然！

3.勿做危險動作
曾經有人喺山崖踩鋼線失手墮崖身亡！雖然每個人都有自己嘅自由，但唔能夠因為自己想做，而要其他人為你承擔責任！你喺山邊做出危險動作，失手的話，唔單止自己無命，消防員分分鐘要冒生命危險救你！害人又害己～

4.不要餵飼野生動物
唔好餵野生動物，咁會令佢哋喪失覓食功能，又或者會令佢哋因為搶嘢食，而襲擊你/其他市民！大家記得行山嘅時候唔好打擾佢哋啦～

5.尊重其他行山人士，勿亂衝亂撞
每個人行山嘅速度都唔同，唔好因為心急就亂衝亂撞，尤其喺狹窄嘅山路，要互相禮讓！

缺少行山經驗嘅人士，記得量力而為，揀返啲適合自己嘅路徑！

Text: HolidaySmart Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）