Netflix《養虎為患》紀錄片將拍成連續劇！奧斯卡影帝尼古拉斯基治擔演主角！

人氣爭議Netflix紀錄片《養虎為患》（Tiger King）將會開拍連續劇！《養虎為患》3月一上架，就立即登上Netflix排行榜頭10位，並且大獲好評，唔少人都話刺激又緊張！

Photo from 《Tiger King》

紀錄片雖然寫實，貼地，但通常都係受少部分人歡迎而已！呢套咁受歡迎嘅紀錄片係講號稱「虎王」嘅鄉謠歌手Joe Exotic，以養老虎為樂，因為同愛護動物組織創辦人Carole Baskin多年積怨，其後因企圖謀殺Carole同虐待動物判囚22年，至今仍然在囚！紀錄片涉及殺人、失蹤奇案、淫亂荒唐生活，揭開繁殖危險動物呢個圈子嘅黑暗面，係充滿離奇荒誕嘅真人真事，討論性極高，絕對滿足到觀眾嘅好奇心！
Photo from 《Tiger King》

Photo from 《Tiger King》

美國CBS同Imagine影視製作公司宣布，將會將《養虎為患》改拍成一季8集嘅電視劇，仲搵嚟奧斯卡影帝尼古拉斯基治（Nicolas Cage）擔演主角兼監製。今次亦係佢入行40年嚟第一次拍劇！消息一出，Nicolas嘅粉絲都相當興奮，網民亦大讚選角合適。第一次拍劇就係做咁有挑戰性、具討論性嘅角色，相信觀眾都非常期待佢嘅演出！
Photo from pinterest

不過故事主角Joe曾經話如果拍成電影嘅話，想搵畢彼特（Brad Pitt）扮演佢～唔知阿Joe點睇今次選角呢～

Text: HolidaySmart Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）