【網上報稅教學2020】無痛填報稅表!稅務易帳戶申請、首次報稅 Q&A

【網上報稅教學2020】無痛填報稅表!稅務易帳戶申請、首次報稅 Q&A

生活熱話 生活教學
ByCelia on 17 Jun 2020 Digital Editor

相信唔少打工仔都已經陸續收到今年2019/20年度嘅報稅表,但對於職場嘅新鮮人嚟講,第一次收到報稅表嘅當下都應該會心存唔少問題,到底要點填寫報稅表、薪俸稅點樣算、收唔到報稅表係咪就代表住你唔使交稅,或者成日聽到人講網上報稅好方便,第一年又可唔可以用網上報稅等等。小編今次就整理咗部分常見嘅問題,同大家一一拆解!

每個人收到報稅表嘅時間都唔一樣,有人早啲有人遲啲,就算係同一間公司工作嘅同事都唔一定會同時收到,有人更會成個報稅年度中都收唔到依份表格。

小編今次就整理咗部分常見嘅問題,同大家一一拆解!

1. 收唔到係咪就代表你依個年度唔使報稅?

當然唔係喇~

2019/20年度嘅個別人士報稅表已於6月1日寄出,納稅人須於報稅表發出日期起嘅一個月內,即7月2日或以前交回報稅表,而以電子方式報稅,則可自動享有一個月交表寬限期,即自動延至8月3日。而每年嘅薪俸稅報稅年度則由每年嘅4月1日至第二年嘅3月31日(共12個月)。

一般嚟講,你嘅僱主會喺你任職3個月內向稅務局提交一份IR56E表格(公司會畀一份紙或電子副本你),以申報包括姓名、地址、婚姻狀況、受僱日期及條款等資料。

而稅務局喺收到資料後,就會自動幫你開立一個稅務檔案,並通常於5個月內主動向你寄出報稅表,而你無須自行再通知稅務局。

但如果你喺期限前都收唔到報稅表,你就要通知稅務局指自己收唔到,並要求稅務局重新寄出報稅表。另外,如果依份並唔係你第一份工並之前以開啟「稅務易」帳戶,咁帳戶持有人就可以喺帳戶中嘅「稅務狀況」部份查詢你有冇尚有未提交嘅報稅表。

2. 2019年先開始做嘢咁使唔使報稅?

頭先都講過,薪俸稅係按年度計算,無論你幾時開始做嘢都係要報稅嘅,所以當你收到稅務局寄嚟嘅「報稅表-個別人士」表格(BIR60)後,無論你嗰個課稅年度內有冇收入,都要喺限期前遞交報稅表。

薪俸稅係按年度計算,無論你幾時開始做嘢都係要報稅嘅
Photo from Presslogic

3. 第一次申報薪俸收入,要點填?

若你喺2019年4月1日前開始工作,你就要申報首3年嘅薪俸收入,即:

2018/19課稅年度:開始受僱日期至2019年3月31日

2019/20課稅年度:2019年4月1日至2020年3月31日

2020/21課稅年度:2020年4月1日至2021年3月31日(稅務局個按照你填寫2019/20課稅年度嘅收入自行預測)

而如果你喺2019年8月18日開始受僱,你就要申報首2年嘅薪俸收入,即:

2019/20課稅年度:2019年8月18日至2020年3月31日

2020/21課稅年度:2020年4月1日至2021年3月31日(稅務局個按照你填寫2019/20課稅年度嘅收入自行預測)

4. 報稅表要點填?

大家可以下載快捷填寫指引嘅英文或中文個別人士報稅表(BIR60)樣本,當中包含咗一些喺填寫時需注意嘅重要事項及例子。

5. 應繳款額點計?

廣告
廣告

薪俸稅係按你喺該年度中實際收入(應課稅入息實額)而徵收的,或以入息淨額以標準稅率計算,兩者取較低嘅稅款額徵收。

應課稅入息實額 = 入息總額 - 扣除總額 - 免稅額總額

入息淨額 = 入息總額 - 扣除總額

但如果你喺依個課稅年度內嘅薪俸收入不超過基本免稅額(年薪$132,000),就可以不用交稅。

常見報稅問題

6. 遲交報稅表有咩後果?

遲交報稅表會被罰款或被檢控,最高可被罰款$10,000。此外,未能如期遞填交報稅表,即代表稅務局冇收到你嘅「免稅額」及「扣除」項目申報,因此局方只會給予你「基本免稅額」,不會給予包括強積金供款、認可慈善捐款、個人進修開支及居所貸款利等項目嘅稅務扣除。

7. 交表後,如發現有錯漏(未收到有關評稅通知書嘅情況下),可否作修改 ?

如你透過互聯網提交報稅表,你可登入「稅務易」帳户內嘅功能選擇「聯絡我們」更正或補充資料。如需更改已提交嘅紙本報稅表資料,則需以書面向評稅主任提出申請。

8. 網上報稅有咩好處?首次報稅又申唔申請得?

其實無論你係第一次報稅定一直都以傳統紙本方式報稅都可以隨時轉換成網上報稅。

而且使用由稅務局推出嘅「稅務易」報稅,不僅可獲延期一個月遞交報稅表,亦可輕鬆查閱報稅表是否已成功提交、即時計算應繳交嘅稅款金額、自己尚有多少稅款並未繳交及直接喺帳戶中更新自己嘅個人資料。

 

講到咁方便咁點申請?!申請方法好簡單,跟著以下幾會Step就開啟到「稅務易」帳戶㗎喇!

申請方法好簡單,跟著以下幾會Step就開啟到「稅務易」帳戶㗎喇!
Photo from 稅務局

1. 進入政府稅務易網站,按下『立即開立/登入「稅務易」帳戶』 選項
2. 申請「稅務易」通行密碼
3. 填上身份證號碼及報稅表格第一頁上方位置的「報稅編號」
4.填好晒之外,佢會提供一個申請「稅務易」交易參考編號畀你

做到依個Step代表已接收到你嘅申請,申請人大概等二至四個工作天,稅務局就會郵寄啟動密碼畀你,之後先可以正式啟用網上服務㗎。

申請人大概等二至四個工作天,稅務局就會郵寄啟動密碼畀你,之後先可以正式啟用網上服務。
Photo from 稅務局

5. 收到啟動密碼信後,再次進入稅務易網站
6. 填寫報稅編號和通行密碼
7. 完成後網站會要求你設立個人報稅編號和通行密碼(新嘅報稅編號係永久性,登記程序一經完成就無法更改
8. 最後,填寫電郵地址及電話號碼等帳戶資料就OK喇

一般建立帳戶後,大家喺收件匣及「稅務狀況」中會收到新訊息,點進去就會見到未提交表格,大家只要跟指示填寫個人資料及報稅資料(如婚姻狀況、供養父母子女、可扣減嘅開支(MPF強積金)等),填完後所有資料都會被記錄,下一年如果冇轉工/個人資料冇變就唔使重新再填過,到時只要更新入息數字就可以喇~

各位,小編身為打工一族都好明白有邊個會想交稅,但依啲係公民責任,所以都係乖乖報稅喇!

Text: HolidaySmart Editorial

(小編公告:如果讀者有任何關於美食、旅遊、玩樂、或者任何新奇有趣事物既資訊,都歡迎話比小編們知~大家可以透過Facebook inbox、或者send e-mail到holiday@presslogic.com,直接將資料傳比小編)

Share to Facebook