WhatsApp 7大必學實用功能 已讀不回唔畀人知/錄音Message變文字/實時位置

WhatsApp 7大必學實用功能 已讀不回唔畀人知/錄音Message變文字/實時位置

生活熱話 生活教學
ByCelia on 20 Aug 2020 Digital Editor

講起通訊 apps 唔少人都是會諗起 WhatsApp、Telegram、Line、WeChat 等之類嘅通訊軟體,而喺香港比較多人用嘅一定係 WhatsApp,但用咗咁耐除咗基本溝通對話之外,你又知唔知其實仲有唔少實用嘅隱藏功能呢?!小編今次就整合咗 7 個冇咩人知又實用嘅功能畀大家~

Photo from pinterest

1. 已讀不回唔畀人知
相信唔少人都知 WhatsApp 可以將「已讀標記」關閉,令藍剔消失唔畀對方知你到底幾時睇咗。不過雖然你關咗「已讀標記」,但喺睇咗 message 後,你嘅對話欄旁「未讀訊息數量」嘅Bubble就會消失,留底「已讀不回」嘅證據,如果被人(另一半)發現都可能好大件事。

咁到底點先可以做到已讀不回但又唔畀人發現呢?其實方法好簡單,只要咁做就得喇,依個方法可以畀你真正做到睇咗都有人知,連「未讀訊息數量」嘅Bubble都依然存在。

1. 當有 message 時,輕力長按對方嘅對話欄1-2秒,便會彈出對話框。

2.持續輕按,閱讀對方的對話內容。

3.睇完直接向下拉,就會返回 WhatsApp 主畫面,依個時候你會見到「未讀訊息數量」嘅Bubble依然存在,即表示你已經成功已讀不回喇!

2. 錄音內容變文字

Photo from App Store

身邊總有一、兩個朋友唔鍾意打字,不時 send 畀你嘅 message 都係錄音嚟,但又唔係成日都方便聽,唔聽又怕 miss 重要訊息。依個時候《Spiko for WhatsApp》就幫到大家喇!

《Spiko for WhatsApp》係一個付費嘅 apps 嚟(只可用於 iOS ),佢可以直接將 WhatsApp 中嘅錄音 message 轉換成文字,咁就唔怕因為唔方便聽而 miss 咗重要訊息,最重要係依個 apps 可以支援廣東話!

1.裝好依個 apps 後,打開喺 whatsapp 中右下角選擇分享,按「更多」,將《Spiko for WhatsApp》加入到捷徑,作通知手機啟用apps。

Photo from App Sore

2.之後,你就可以輕按錄音選擇「轉發」,並選擇 Spiko for whatsapp。

3.然後你會收到一個「Please wait」嘅訊息,等幾秒後就會收到「Click here to see the translation」字句彈出後,點選後就會自動彈出錄音內容。

但有一點必須提提大家翻譯出嘅字句可能會出現同音字,不過小編覺得對字句整體意思影響唔大。

3.唔使Save對方電話可對話

Photo from HolidaySmart

依家唔少餐廳/網購為咗方便都會推出 WhatsApp 落單、book枱等服務,但依啲情況好多時都唔會成日聯絡,甚至可能只會用 1 次,依個時候你只要利用 Safari/Chrome 輸入 https://api.whatsapp.com/send?phone=國家區號+電話號碼,就可以唔使 save 對方電話都可以 send message 畀對方。

如:香港區號就是852,對方電話為12345678 ,咁你就輸入https://api.whatsapp.com/send?phone=85212345678

輸入後就會出現「要在WhatsApp裹開啟此網站嗎?」,按開啟後就可以直進 whatsapp 中send message 畀對方喇。

4.選擇刪除文件類型

Photo from shutterstock

如果你手機本身嘅容量唔算好大,加上又鍾意同朋友 share 靚相,咁你就一定有過被通知手機容量不足嘅情況,依個時候清理 WhatsApp 中嘅資料就你必然嘅選擇喇!但「清除對話」嘅同時又怕清除咗重要嘅對話。

廣告
廣告

其實 WhatsApp 係可以選擇性 delete 所有圖片、影片或文字。

大家只要跟往以下幾個 step 就得:

1.開啟WhatsApp,揀選「設定」中嘅「數據和儲存用量」

2.再選「儲存空間用量」,選擇想清除數據嘅聯絡人

3.依個時候,你就可以從中睇到自己與對方嘅對話及媒體嘅數據相關資訊,click 入「管理」

4.咁就可以選擇性地將唔同嘅媒體數據 delete,釋放更多嘅空間。(建議大家只要清除照片、影片及語音就夠喇,文字對話佔嘅用量其實唔係好多,所以唔清都得!)

5.「實時位置」

Photo from shutterstock

唔知大家身邊有冇一個路癡或者愛遲到嘅朋友,當你每次問對方去到邊時總會答「就到!」、「行緊過嚟啦」之類,正正因為咁,WhatsApp 就推出咗實時位置功能。大家只要喺訊息輸入位旁邊嘅「+」號中選取「位置」後,再選擇「分享實時位置」,就可以揀分享時間(分別有「15分鐘」、「1小時」、「8小時」),咁就可以即是畀朋友知你依家到底喺邊。

如果想結束,就直接選「停止分享」就 OK 喇!

6.傳送高清相

Photo from Whatsapp

使用前必須將傳送照片上傳至雲端硬碟如 Google Drive 、 Dropbox 或手機嘅檔案中。

步驟如下:

1. 喺訊息輸入位旁邊嘅「+」號中選取「文件」。

2.選擇相片所在嘅位置。

3.揀好你想傳送嘅相片,再按「完成」就可以。

7.隱藏訊息預覽

Photo from whatsapp

私隱就每個人都有,但人總會因為好奇心而想去睇人哋手機,加上唔知點解「人哋手機總係比較好睇」嘅心理,但你又唔想被人𥄫到你啲 message,依個時候你就可以喺 WhatsApp 中將「顯示預覽」設定關閉,免除煩惱。

當然如果你冇咩係唔畀得人知, 唔set 都冇問題喇!

Text: HolidaySmart Editorial

(小編公告:如果讀者有任何關於美食、旅遊、玩樂、或者任何新奇有趣事物既資訊,都歡迎話比小編們知~大家可以透過Facebook inbox、或者send e-mail到holiday@presslogic.com,直接將資料傳比小編)

Share to Facebook