首間水上 Apple Store 即將登錄新加坡　全球仲有竹林/玻璃盒/水簾洞間間各有特色

Apple Store 喺全球超過 500 間分店，而每個地方嘅分店都有唔同嘅特色，當中有被竹林包圍、睇起似水簾洞、融合當地歷史建築嘅設計等等，間間設計都各有特色。而嚟緊喺新加坡將會再增添一間浮喺水上嘅 Apple Store 喇！

今次依間浮喺水上嘅 Apple Store 係新加坡第三間分店 Apple Marina Bay Sands，新店位於 Marina Bay 區，係全球首間興建喺水上嘅 Apple Store。

Photo from Todayonline

從外面睇 Apple Store 呈半圓球形，喺夜晚睇時就好似燈籠一樣，半圓球形嘅外牆可反映市中心嘅天際線及水面嘅波紋，而球形嘅頂部可讓光進入店內，符合以往追求自然採光嘅原則。

而顧客要由岸邊進入店舖，就需要經過一條水上嘅行人隧道，就好似要登船一樣！

Photo from pinterest

雖然Apple Marina Bay Sands 就仲未正式開幕，但依個浮喺水面嘅半圓體已成引咗唔少人去打卡影相，相信到正式開幕時又引起一陣打卡熱喇！

Photo from pinterest

其實除咗依間水上 Apple Store 之外，全球仲有好多唔同特色嘅分店㗎！就好似......

1. 美國曼哈頓第五大道
Apple Fifth Avenue 位於紐約曼哈頓第五大道，係一間 24 小時營業嘅 Apple Store嚟。其獨特嘅全玻璃地面入口設計，採用無縫銜接技術，係唔少人去紐約時必訪嘅旅遊熱點之一。

Photo from Apple

2. 澳門金沙廣場
依間係 Apple 喺澳門嘅第二分店，位於氹仔金沙城金沙廣場，獨立式三層建築，隱藏竹林中與其他 Apple Store 相比增添咗一分文藝氣息。此次，店內由地下延伸至二樓天窗嘅竹林更係全球首創嘅店內設計嚟添～

Photo from Apple

3. 日本京都
就咁睇，京都依間分店嘅外觀冇咩特別，但如果你行到入去就會充滿體驗到傳統嘅日式風情，分店以日本燈籠為設計靈感，喺二樓採用輕透嘅設計，加上日式和紙拉門以及以和紙拼湊成格子，係咪有一種走入日本傳統住屋嘅感覺呢！

Photo from Apple

4. 泰國 Central World
Apple Central World 係首間採用全玻璃設計嘅分店，配合呈樹冠狀嘅懸臂式屋頂，造就獨樹一幟嘅建築風格。分店上下兩層均設有入口，大家可以從地面或上層進出，上層空間仲可以直接通往 Skytrain 及市內最大嘅購物中心。而分店外嘅戶外廣場則為社群提供咗相聚嘅地方，四周設有長凳，可供大家休息。

Photo from Apple

5. 意大利米蘭
Apple Piazza Liberty 位於米蘭著名 Corso Vittorio Emanuele 購物街中嘅廣場中央。入口與階梯形成一個小劇場，入口處設有玻璃立方體噴泉，置身其中真係會有一種好似行咗入水簾洞嘅錯覺。

Photo from Apple

Photo from Apple

6. 英國倫敦
Apple Regent Street 位於英國倫敦攝政街，依間係 Apple 喺歐洲嘅第一家分店嚟，分店隱身於一座二級歷史保護嘅傳統建築物中，同以後主打以玻璃設計完全係另一種感覺。

Photo from Apple

唔知各位「果農」又去咗邊間打卡呢？！

Text: HolidaySmart Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）