日本兩大男神畫功引熱議　木村拓哉、龜梨和也為慈善製作限定ONE PIECE手繪貼圖　

為咗鼓勵同支持日本一班為咗新冠肺炎而不眠不休嘅醫護人員，《ONE PIECE》近日就宣布同尊尼事務所合作，發行限定「ONE PIECE X Smile Up line stickers」﹐並將今次所得嘅收入全數捐畀相關嘅醫療機構﹐希望為疫情出一分力。

Photo from 木村拓哉instagram

呢套stickers一共有24張，除咗《ONE PIECE》作者－尾田榮一郎嘅手繪圖之外，就連男神木村拓哉同龜梨和也都有份製作今次呢套 stickers，所以呢套stickers將會有三種唔同嘅畫風～

尾田嘅作品將《ONE PIECE》入面嘅角色融合木村拓哉同龜梨和也嘅口頭禪，有晒雙方特色。

Photo from 木村拓哉instagram

唔少粉絲都知道木村拓哉係一名 ONE PIECE 嘅狂迷，今次受到作者邀請參與此計劃，佢覺得好榮幸。

而早喺 5 月嗰陣，木村拓哉就有 post 過自己畫緊紅髮撒古斯嘅素描，依家我哋終於睇到最後嘅成品啦～

Photo from 木村拓哉微博

木村拓哉喺訪問入面提到 ONE PIECE 嘅對白都好熱血，希望可以藉住唔同嘅名場景 stickers 去為前線嘅醫護人員打氣。

Photo from 木村拓哉instagram

龜梨和也亦喺訪問入面講到自己雖然畫畫唔係好叻，但都好多謝作者畀咗呢次機會佢去為大家製作啲日常生活都適用到嘅 stickers。

Photo from 木村拓哉instagram

呢套咁特別嘅 stickers 已經喺日本版嘅 Line 上咗架，貼圖一推出已成為熱話，大家都紛紛討論兩大男神嘅畫功。有網民表示完全睇唔出木村竟然畫畫咁叻！而龜梨和也嘅作品都被粉絲讚可愛～

不過依家國際版暫時就仲未上架，香港嘅粉絲可能要再等一等先欣賞到兩大男神嘅畫功啦～

One Piece x Johnny's Smile Up! Project LINE貼圖 (日本地區)
數量：一套24張
推出日期：2020年8月27日－2020年11月26日
售價：250円（約港幣 $18.3）

Text: HolidaySmart Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）