《哈利波特》前傳電影《怪獸與牠們的產地》第3集確定明年11月全美上映　唔知香港會唔會同步呢？！

身為《哈利波特》迷嘅你一定唔會冇睇過前傳電影《怪獸與牠們的產地》依個系列，對上一次集《怪獸與葛林戴華德之罪》已經係 2018 年嘅事喇！而按照依個系列每隔兩年就會推出新一集嘅慣例，本來應該係今年推出第3集，但因為作者 JK 羅琳想呈現更完整嘅「魔法世界」樣貌畀大家睇，積極修改故事走向，故整個拍攝延至今年 2 月先開拍，而上映日期亦已確定於 2021 年 11 月喺美國上映。

有指嚟到第三集故事將著重喺鄧不利多和葛林戴華德嘅感情上以及喺葛林戴華德執掌下嘅魔法世界，同時亦會解開上一集《怪獸與葛林戴華德之罪》所埋下嘅伏線。

Photo from WBPicturesHK

而有睇過嘅大家一定會記得戲中嘅「麻瓜」雅各，上一集時佢因為同巫師女友奎妮分手，而大受打擊，佢早前就透露希望作者可以寫佢同女友奎妮復合，唔知佢想以咩形式追番被黑化咗嘅奎妮呢？！

Photo from WBPicturesHK

另外，第一、二集中男主角紐特都會遇到新嘅怪獸，唔知今年嘅場景去到巴西又會唔會有新嘅怪獸同大家見面呢？

Photo from WBPicturesHK

第三集已經喺巴西開拍，相信到時一定更絢麗奪目、多采多姿，呈現更廣闊嘅魔法世界觀！其實《怪獸》系列將會有5部曲，第一部同第二部相隔兩年，而第二部同第三部就相隔 3 年先同大家見面，咁第四部會唔會要再隔 4 年先有先睇㗎，可唔可以唔好隔咁耐呀～

Photo from WBPicturesHK

雖然第三集打破咗兩年上映一集嘅慣例，不過一班 fans 都唔使唔開心，事關已經有正式上映時間，全美確定會喺明年 11 月 12 日上映，唔知到時香港會唔會同步上映呢？

Photo from WBPicturesHK

如果可以就好喇，相信一班魔法 fans 都好等待再次走入神秘嘅魔法世界！

Text: HolidaySmart Editorial
（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）