私心推薦!遊韓必食30年傳統老店「一隻雞刀切麵」

私心推薦!遊韓必食30年傳統老店「一隻雞刀切麵」

美食推介
ByCelia on 08 Sep 2020 Digital Editor

韓國美食眾多,相信大家遊韓時都必定會食韓國嘅「一隻雞」。講起「一隻雞」,唔少人都一定會講得出「孔陵一隻雞」同「陳玉華一隻雞」。不過今日小編要同大家介紹嘅係一間連韓國著名廚師加主持人白鍾元都推薦嘅食店「一隻雞刀切麵元祖家」(닭한마리칼국수 원조집)。喺韓國美食節目《白鍾元的三大天王》入面,都曾經介紹過呢間 30 幾年嘅食店。講到明係「元祖家」,當然要有返咁上下歷史啦!

一隻雞刀切麵元祖家
Photo from HolidaySmart

「一隻雞刀切麵元祖家」位於首爾忠正路站,位置比較偏僻,亦都唔係遊客區,不過呢個味道絕對值得去尋找。一隻雞嘅湯頭係非常重要的,呢到嘅湯頭睇落好清,但其實非常濃郁清甜,建議大家食雞肉前一定要飲番碗湯!除咗水泡菜,雞肉更相當軟嫩,舖頭仲提供特製嘅醬汁畀客人,鮮味立即提升!

韓國著名廚師加主持人白鍾元都推薦過㗎!
Photo from 《白鍾元的三大天王》

除咗一隻雞,舖頭仲有一款美食係必點嘅,就係佢哋嘅餃子,大大粒,皮薄餡多,加埋落個湯度,簡直一流!小編強烈推薦一定要加餃子!

話到明係「一隻雞刀切麵」,點可以唔食麵呢!刀切麵吸滿雞湯嘅精華,食埋啲麵再飲埋啖湯,咁就十分圓滿啦~

刀切麵吸滿雞湯嘅精華,食埋啲麵再飲埋啖湯,咁就十分圓滿啦~
Photo from 《白鍾元的三大天王》

留意番,因為餐廳係傳統嘅韓國餐廳,餐牌只有韓文,不過餐廳官網有中文翻譯,點餐就容易啲啦。

廣告
廣告

餐廳內嘅餐牌只有韓文,不過餐廳官網有中文翻譯
Photo from 닭한마리칼국수 원조집

除咗「一隻雞」,舖頭都有其他嘢食,好似海鮮蔥餅、辣雞湯及涼拌辣雞等,大家都可以試吓喔!

辣雞湯
Photo from 닭한마리칼국수 원조집

海鮮蔥餅
Photo from 닭한마리칼국수 원조집

小編去韓國最鍾意搵啲當地人會去嘅餐廳,貪佢冇咩遊客,可以感受一下地道嘅韓國,呢間餐廳係小編每次去韓國都必定會去嘅餐廳之一,大家可以 bookmark 定,等疫情過後可以去韓國旅行嘅時候,不妨去試吓!

一隻雞刀切麵元祖家(닭한마리칼국수 원조집)
地址:首爾特別市中區青坡路457-1(서울특별시 중구 청파로 457-1),忠正路站4號出口
營業時間:11:00 – 22:00,逢星期六、日休息

Text: HolidaySmart Editorial

(小編公告:如果讀者有任何關於美食、旅遊、玩樂、或者任何新奇有趣事物既資訊,都歡迎話比小編們知~大家可以透過Facebook inbox、或者send e-mail到holiday@presslogic.com,直接將資料傳比小編)

Share to Facebook