台中捷運綠線預計10月通車 官方再撥資增設7個站?

台中捷運綠線預計10月通車 官方再撥資增設7個站?

旅遊新聞
ByCharlie on 08 Sep 2020 Digital Content Writer

等咗咁耐,台中終於有捷運啦!籌備咗十年嘅台中捷運綠線(烏日文心北屯線)預計喺 10 月就會通車,而伴隨住綠線嘅開通,原本嘅路線規劃亦準備延伸,希望完善大台中生活圈!

Photo from 臺中市政府交通局

綠線連接住北屯總站同高鐵台中站,總共有18個站,全程大約 16.71 公里,預計 10 月 31 日就會正式通車,路線亦連接咗唔少旅遊熱點,例如國家歌劇院、大遠百貨等,亦都接駁咗高鐵站、機場捷運等,對於旅客嚟講真係一個好消息呀!

Photo from 臺中市政府交通局

同一時間,台中市政府亦都宣布撥資大約 277 億台幣去進行綠線延伸計劃,將綠線路經嘅車站延伸到大坑區同彰化區,令到台中嘅交通更加便利。

大坑同彰化延伸段將原本嘅綠線向左右延伸,分別由舊社站同高鐵台中站開始,大坑延伸段由舊社站開始,中間將設立多 2 個車站,而彰化延伸段就會由高鐵台中站開始,途中將設立 5 個車站

Photo from 臺中市政府交通局

廣告
廣告

台中交通局預計延伸工程完成之後路線全長就會再增加多 9.08 公里,到時又更加方便啦~

至於其他捷運路線都仲喺籌備同規劃階段,但相信佢哋好快就會同我哋見面㗎啦,到時大家出入又多個選擇啦~

Photo from 臺中市政府交通局

 

Text: HolidaySmart Editorial

(小編公告:如果讀者有任何關於美食、旅遊、玩樂、或者任何新奇有趣事物既資訊,都歡迎話比小編們知~大家可以透過Facebook inbox、或者send e-mail到holiday@presslogic.com,直接將資料傳比小編)

Share to Facebook