彭于晏《第一爐香》首條預告片曝光　戲內大曬好身材同葡文

香港導演許鞍華喺今屆嘅威尼斯影展榮獲終身成就金獅獎，而佢執導嘅《第一爐香》都成功入圍非競賽單元。《第一爐香》嘅首條預告片就喺日前公開，而男主角彭于晏更加成為討論嘅焦點！

Photo from facebook@poemmovie

呢條雖然係電影第一條預告片，但已經見到有唔少嘅情慾畫面，而彭于晏飾演嘅「喬琪喬」亦都周旋喺唔同女性之間，唔單止有激吻鏡頭，仲被其他女性打咗一巴添！

Photo from ig＠yuyanpeng

Photo from ig＠yuyanpeng

而相信話題性最高嘅就係彭于晏半裸上身，大曬人魚線嗰幕，真係相當養眼！彭于晏更加為咗角色去苦練葡文同跳舞，希望可以演譯出喬琪喬嘅風流倜儻！預告片入面亦可以見到彭生努力嘅成果！

Photo from ig＠yuyanpeng

Photo from ig＠yuyanpeng

《第一爐香》係改編自張愛玲嘅小說《沈香屑·第一爐香》，故事講述女學生「葛薇龍」離開上海到香港求學嗰陣識到花花公子「喬琪喬」，仲同佢姑媽「梁太太」一齊捲入混亂嘅關係之中，最後更加淪為交際花。

呢套電影可謂中港台巨星群集！除咗有彭于晏、馬思純、俞飛鴻三位主演之外，仲有梁洛施、秦沛、張鈞甯等擔任配角，而戲外同彭于晏傳緋聞嘅張鈞甯，喺戲內都有被彭于晏勾引，可以話激情四射！

Photo from ig＠yuyanpeng

幕後班底陣容亦都唔惹少！除咗有導演許鞍華坐鎮之外，仲有王家衛嘅御用攝影指導杜可風、錄音指導杜篤之同音樂監制坂本龍一等，位位都係大師級人馬，觀看指數勁高！

依家暫時都未公布香港嘅上映日期，各位彭太唯有不斷翻睇條預告片止住渴先啦～

Text: HolidaySmart Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）