余慕蓮患肺纖維化獨居靠朋友照顧：醫生話無得醫都係等時間

83歲嘅余慕蓮多年嚟做唔少善事，近年健康情況大不如前，早前患耳石症又暈又嘔，近日再驗出患肺纖維化，需住院8日。余慕蓮現時獨居靠朋友照顧，指有醫生知佢做開善事唔收佢錢。

演員余慕蓮喺大台做綠葉，雖然獨身一人，但多年嚟仍為唔少山區兒童捐錢、起學校，係知名嘅慈善家。

現年83歲嘅余慕蓮近年健康情況大不如前，幾個月前患耳石症，令到佢又暈又嘔。

最近佢又驗出肺部纖維化，呼吸困難。佢接受訪問時就表示：「行個零字就已經氣喘，醫生都話無得醫，都係等時間，遲啲可能要吸氧氣。」

因為余慕蓮單身又無兒無女，出院後變獨居老人，靠朋友照顧，買餸上門等。

余慕蓮又指有醫生更唔收佢醫藥費，因為知道佢平時有做義工同捐錢起學校。佢澄清自己有積蓄，可以照顧到自己。

Text: HolidaySmart Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）