【香港電影】5套同中秋有關嘅港產片 睇住戲咁慶祝八月十五~

【香港電影】5套同中秋有關嘅港產片 睇住戲咁慶祝八月十五~

電視電影 中秋節特輯
ByCharlie on 11 Sep 2020 Digital Content Writer

一年容易又中秋!今年中秋連放 4 日假,過節期間最啱就係睇電影啦~小編嚴選咗 5 套同中秋有啲關係嘅香港電影,等大家睇緊戲嗰時都應緊節~

1.《追擊八月十五》

Photo from wmoov

其實呢套電影內容完全同中秋無關,純粹因為中秋就係「八月十五」,所以小編就揀咗佢啦~劇情其實同日本嘅《我的機械女友》有啲似,但呢套就可以睇埋啊 Sa 高難度挑戰一人分飾三角!有機會真係要睇下呢套鄭中基同啊 Sa 嘅定情電影啦~

另外,呢套 2004 年嘅戲對警察嘅刻畫竟然同依家係零違和感,真係唔知係可笑定可悲。

Photo from 《追擊八月十五》

2. 《歲月神偷》

Photo from wmoov

《歲月神偷》將一個六十年代香港小家庭點樣努力生存嘅情況刻畫出嚟,同時都畀我哋睇到當時嘅中秋係點樣。

入面有幾幕同中秋有關而又好 warm 嘅場景:羅媽帶咗八盒月餅返屋企,但扣晒畀親朋戚友同當差嘅份之後,一家四口淨係分到兩舊月餅仔。雖然屋企好窮,但佢哋依然係打鬧咁過日子,為咗慶節仲一齊入戲院睇戲,平淡得嚟好寫實。

有幕係羅進二同羅媽扭計,話要食晒一盒雙黃蓮蓉月!勁搞笑!
Photo from 歲月神偷

「鞋」字雖然半邊難,但都有半邊佳,希望呢套戲可以勉勵到大家啦~

Photo from 歲月神偷

3. 《九品芝麻官》

Photo from wmoov

廣告
廣告

無論咩節日,睇周星馳啲戲是常識吧!咁到底《九品芝麻官》同中秋有咩關係呢?記唔記得入面有幕係包龍星同吳好緹喺天台上面望住個超大月亮談心,最後個月亮變埋做心型添!咁大家睇緊戲嘅時候可以順手賞埋月,掂晒!

雖然依家社會上日日都上演緊戚秦氏「原告變被告」嘅情景,但係小編就覺得套戲都為依家嘅香港人帶嚟唔少啟示。入面嘅包龍星喺官官相衛嘅環境底下過咗唔少關先幫到戚秦氏翻案,小編始終相信有日香港都可以打破依家嘅困局!

Photo from 九品芝麻官

4.《花好月圓》

Photo from wmoov

好記得細個一到中秋,電視就會播《花好月圓》,可能因為套戲名夠「中秋」掛!電影其實都係講緊一方有缺憾,但另一方就不離不棄嘅愛情故事,唔使審,最後梗係 happy ending 啦!雖然劇情真係老套到爆,但係就勝在佢夠輕鬆搞笑,中秋同一家大細睇就最啱㗎啦~

Photo from 花好月圓

5.《香港製造》

Photo from wmoov

會揀呢套電影係因為入面有個角色叫中秋,佢亦係一部值得更多人留意嘅獨立電影!電影圍繞住 97 年間屋邨入面幾個後生仔嘅生活,佢哋各自都有唔同嘅問題,好似完全無希望咁,最後大家亦都走上咗不歸路,好似用死去控訴緊個社會咁。的確,呢套並唔係啲咩合家歡電影,睇完套戲可能會覺得好壓抑添!但呢套電影會令大家睇到好有共鳴,大家不妨畀次機會佢。

Photo from 香港製造

大家有機會都要多啲支持唔同嘅港產片呀~

Text: HolidaySmart Editorial

(小編公告:如果讀者有任何關於美食、旅遊、玩樂、或者任何新奇有趣事物既資訊,都歡迎話比小編們知~大家可以透過Facebook inbox、或者send e-mail到holiday@presslogic.com,直接將資料傳比小編)

Share to Facebook