精選必看大熱韓國漫畫!浪漫愛情到驚悚恐怖嘅都有!

精選必看大熱韓國漫畫!浪漫愛情到驚悚恐怖嘅都有!

時事熱話 生活熱話
ByJennifer on 11 Sep 2020 Digital Editor

韓國嘅 webtoon 非常受歡迎,好多韓劇同電影都係由 webtoon 嘅漫畫改編,好似《與神同行》、《我的 ID 是江南美人》及《奶酪陷阱》等。今次就推介一下必看嘅三套 webtoon 漫畫,其中兩套仲會拍成電視劇同電影添~

《女神降臨》

《女神降臨》講述女主角「任朱靜」靠超強化妝術將自己由醜小鴨變成天鵝,同兩個靚仔同學「李修豪」及「韓書竣」擦出火花嘅青春愛情故事。故事劇情就好似韓劇咁,唔太複雜,但又會激發你嘅少女心,讀者更分成「修豪派」同「書竣派」!漫畫嘅畫風非常少女,每個細節都畫得非常精緻細膩,呢點亦都係吸引原因之一。

《女神降臨》即將翻拍成韓劇,由文佳煐出演女主角「任朱靜」,男主角「李修豪」就由「臉蛋天才」車銀優出演。

m_kayoung@IG
Photo from m_kayoung@IG

eunwo.o_c@IG
Photo from eunwo.o_c@IG

《盜臉人生》

《盜臉人生》係由多個小故事組成,每個單元都係一個新故事。而成個漫畫嘅主線係講有兩個神秘人物幫人「盜臉」,但當「分身」遇上「本尊」並對望,「分身」就會冇命。其中<崔寶潤>一篇令人印象深刻,故事講述一個被家庭同社會遺棄嘅女仔「崔寶潤」,外形唔討好,性格陰沉,當佢想尋死嘅時候突然有兩個人出現幫佢「盜臉」變成靚女,佢自此過上另一個人生,但因為自己性格問題,條路並冇佢想像中咁順利,更發生咗一連串事件。

廣告
廣告

呢套漫畫題材新穎,反映咗「以貌取人」嘅社會問題,令人反思,值得一看!

《奇奇怪怪》

《奇奇怪怪》同樣都係由多個小故事組成,當中<整容液>有非常大嘅迴響。故事講述社會流行一種「整容液」,只要將想整嘅部位浸泡一陣就可以自由塑形。主角「韓藝智」身形肥胖,面容唔姣好,佢利用「整容液」將自己改頭換面,成為網絡女神,識到靚仔男友,不過「整容液」嘅副作用令佢失控,仲做出一啲駭人行為。

<整容液>同<崔寶潤>一樣都係以「外貌」為主題,大膽觸及韓國嘅整容話題,無疑都係對韓國「外貌至上」呢個社會狀況嘅諷刺。<整容液>拍成動畫電影,9月9日已經喺韓國上映,討論度同評價都非常高。

webtoon
Photo from webtoon

呢三套漫畫討論度非常高,非常推薦大家去睇,漫畫有中文版本,唔使驚睇唔明~疫情之下,用嚟消磨時間都唔錯!

Text: HolidaySmart Editorial

(小編公告:如果讀者有任何關於美食、旅遊、玩樂、或者任何新奇有趣事物既資訊,都歡迎話比小編們知~大家可以透過Facebook inbox、或者send e-mail到holiday@presslogic.com,直接將資料傳比小編)

Share to Facebook