韓綜《新西遊記》返嚟喇!節目組突擊開 live 透露播放日期 成員 cosplay 造型笑爆嘴!

韓綜《新西遊記》返嚟喇!節目組突擊開 live 透露播放日期 成員 cosplay 造型笑爆嘴!

電視電影 娛樂新聞
ByCelia on 15 Sep 2020 Digital Editor

韓國電視台 tvN 嘅綜藝《新西遊記》非常受歡迎,已經播咗七季,第八季嚟緊都有得睇喇!節目組喺拍攝期間突擊開 live,成員要答啱問題先可以落車做智異山嘅美食吃播,live 期間透露咗節目將會喺 10 月 9 日播放!大家又有綜藝追喇~

今季唔會有安宰賢參與拍攝,將會由第七季嘅原班人馬宋旻浩(Winner)、P.O(Block B)、圭賢(Super Junior)、殷志源(水晶男孩)、姜虎東以及李壽根繼續出演。

Photo from 《新西遊記7》

《新西遊記》出名 cosplay,每一季嘅 cosplay 造型都令人笑爆,好似圭賢版「美國自由神像」、「Joker」及「燈神」;姜虎東版「神妙漢」及「無臉男」等,都笑到噴飯!今次第八季嘅 cosplay 造型令人非常期待~喺 live 入面預先公開咗某幾個成員今次嘅 cosplay 造型,果然不負眾望~

打頭陣嘅係圭賢做嘅美食吃播,圭賢今次著上女裝韓服,戴埋假髮,最好笑嘅係佢嘅眼線同嗰粒墨~雖然佢做緊吃播,不過佢呢身造型咁搶鏡,完全忽略咗佢食緊咩~

Photo from tvnbros@ig

第二個就係姜虎東嘅炸醬麵同糖醋肉吃播,今次佢嘅 cosplay 造型冇之前嘅咁出位,相信係咁多個造型入面難度比較低嘅一個~

廣告
廣告

Photo from tvnbros@ig

之後仲有殷志源嘅甜品吃播,睇完佢嘅 cosplay 造型之後,小編估計最難嘅造型應該畀佢揀中咗~佢扮嘅係「angry bird」!呢個造型要成塊面油上顏色,犧牲都幾大吓!

Photo from tvnbros@ig

睇完個 live 之後更加期待今季嘅《新西遊記》喇~唔知其他成員嘅 cosplay 造型又會係點呢?

Photo from tvnbros@ig

Text: HolidaySmart Editorial

(小編公告:如果讀者有任何關於美食、旅遊、玩樂、或者任何新奇有趣事物既資訊,都歡迎話比小編們知~大家可以透過Facebook inbox、或者send e-mail到holiday@presslogic.com,直接將資料傳比小編)

Share to Facebook