Netflix 原創劇《非常校護檔案》即將播出！南柱赫孖鄭有美同你一齊搞笑驅魔～

由「南朋友」南柱赫同鄭有美主演嘅 Netflix 原創劇《非常校護檔案》即將喺 9 月 25 日播出喇！大家又多一套劇追喇～南柱赫除咗早前介紹過嘅新劇《Start Up》之外，仲有依套《非常校護檔案》，睇嚟依位「南朋友」將會霸佔晒大家 9 月至 10 月嘅時間啊～

Photo from Netflix

《非常校護檔案》改編自鄭世朗作家嘅長篇小說《保健教師安恩英》，今次嘅劇本都係由鄭作家親自執筆，係一個搞笑驅魔故事。故事講述女主角「安恩英」（鄭有美 飾）係一個擁有驅魔能力嘅高中保健老師，佢睇到常人睇唔到嘅妖魔鬼怪，更喺學校裏面發現好多神秘事件，最後同新任嘅韓文老師「洪仁杓」（南柱赫 飾）一齊驅魔，拯救學校。

Photo from Netflix Asia@YouTube

鄭有美飾演嘅「安恩英」擁有驅魔能力，用新穎又搞笑嘅方法驅魔，喺海報上面嗰啲好似啫喱咁嘅不明物體就係妖魔鬼怪嚟～咁特別嘅妖魔鬼怪大家又見過未呢？

Photo from Netflix Asia@YouTube

Photo from Netflix Asia@YouTube

南柱赫飾演嘅「洪仁杓」係一個韓文老師，細個嗰陣因為交通意外而跛腳，後來去爺爺創辦嘅學校教書。佢有強大嘅氣場，可以幫「安恩英」充電，幫助佢驅魔。南柱赫繼韓劇《耀眼》之後又再譜「姊弟戀」～鄭有美同南柱赫雖然相差11歲，不過因為鄭有美嘅童顏外表，同南柱赫企埋一齊都係咁襯啊！

Photo from Netflix Asia@YouTube

Photo from Netflix Asia@YouTube

《非常校護檔案》只有6集，會一次過全部上線，咁樣大家就唔使逐集等更新等得咁辛苦喇～

Text: HolidaySmart Editorial

（小編公告：如果讀者有任何關於美食、旅遊、玩樂、或者任何新奇有趣事物既資訊，都歡迎話比小編們知～大家可以透過Facebook inbox、或者send e-mail到holiday@presslogic.com，直接將資料傳比小編）