「香港先生」分享面試趣事 黃祥興「有背景」所以先 pass？！

黃祥興、袁偉豪及高鈞賢作客節目《Tiger's Talk》談及當年參選「香港先生」嘅面試趣事。當時一個年紀輕輕咩都唔知，一個就啱啱返香港廣東話唔太好，一個就才藝表演嗰陣尷尷尬尬咁，聽返真係好好笑。

Photo from myTV SUPER@YouTube

袁偉豪憶述當時面試去到才藝表演個環節，淨係著住平腳嘅泳褲，冇著衫，揹住結他，評判坐喺到望住佢，就好似望住一個全裸嘅人咁，攞住結他遮住自己係到唱歌表演。主持人伍詠薇同 Bob 聽完之後笑爆嘴。

Photo from benontheroad@ig

黃祥興仲犀利，竟然錯過咗面試時間！佢當時啱啱返香港冇幾耐，廣東話仲係麻麻地，收到電話叫佢星期一面試，點知當日去到地鐵站，等極都冇人，後尾先發現原來聽錯日子！「星期日」聽錯咗做「星期一」，已經錯過咗面試日子！不過好好彩地可以畀佢後補面試。到佢面試自我介紹嘅時候，話自己來自法國，評判即刻話：「得喇！來自法國 ok 喇！你好特別啊！」然後就 pass 咗！估唔到結果竟然峰迴路轉，黃祥興靠自己嘅「特殊背景」就 pass 咗，真係令人笑爆！

Photo from stefanwch@ig

高鈞賢當年參選只有 21 歲，年紀輕輕，面對記者嘅請求照單全收。記者要佢擺咩甫士，佢就擺咩甫士，要佢扮咩，佢就扮咩，淨係識得瘋狂 chok 住畀記者影相。

Photo from mattkobe@ig

黃祥興同高鈞賢係 2005 年嘅「香港先生」，而袁偉豪就係 2007 年嘅「香港先生」，眨下眼已經過咗咁多年，真係時光飛逝～

Photo from stefanwch@ig